دارىگەرلەر ەكپە العان بالالار اۋتيزم نەمەسە سال اۋرۋىنا شالدىعادى دەگەن قاۋەسەتتى جوققا شىعاردى.

بۇل تۋرالى الماتىدا وتكەن «ۆەريت ي جيت» الەۋمەتتىك مەديسينالىق فورۋم بارىسىندا ىندەتتى باقىلاۋ باسقارماسىنىڭ باس ساراپشىسى نۇرشاي ازىمبايەۆا مالىمدەدى.

مامانداردىڭ ايتۋىنشا، قازاقستاندىقتاردىڭ 95%-ى ەكپە العان. باس تارتقان ادامداردىڭ ۇلەسى 0،1-2 % بولىپ وتىر.

ازىرگە ەكپە الماعان بالالار ەكپە العانداردىڭ ارقاسىندا اۋرۋ جۇقتىرۋدان امان ءجۇر.

«بۇل ماسەلە الەمدە قىزۋ تالقىلانىپ جاتىر. قانشاما زەرتتەۋلەر جۇرگىزىلدى. سونىڭ ارقاسىندا اۋتيزم، سال اۋرۋلارىمەن ەكپە اراسىندا ەشقانداي بايلانىس جوق ەكەندىگى دالەلدەندى. بۇرىن مۇنداي اۋرۋلار از بولاتىن. بۇل جۇكتىلىكتىڭ اۋىر وتۋىمەن بايلانىستى بولۋى مۇمكىن. وتاندىق عالىمدار جۇرگىزگەن زەرتتەۋلەر ناتيجەسىندە بالالاردىڭ 60 پايىزىندا بوسانۋ كەزىندە قيىندىق بولعانى انىقتالدى. 50 پايىزدان استامى ىشتە جاتىپ جۇقپاعا شالدىعادى. ەكپە العان دا الماعان دا بالالاردىڭ اراسىندا ونداي اۋىر اۋرۋلار بىردەي كەزدەسەدى»، - دەدى نۇرشاي ازىمبايەۆا.

مۇنداي قاۋەسەتتىڭ تارالۋىنا ينتەرنەتتەگى جازبالار مەن ۆيدەولار تۇرتكى بولىپ وتىر.

«ەكپەدەن باس تارتقان اتا-انالاردىڭ بالالارى كەرىسىنشە اۋرۋلارى اسقىنىپ جاتىر. وتكەن جىلى قىزىلشاعا شالدىققان 9 جاستاعى بالا 8 اي بويى اۋىرعان. بۇل جۇقپادان سوڭ بالادا ەنسەفاليت باستالدى. اتا-اناسى بارماعان جەرى جوق. بۇل اۋرۋعا قارسى ەم جوق بولعان سوڭ بالاعا ەشكىم كومەكتەسە العان جوق»، - دەدى ازىمبايەۆا.

قازاقستان ۇلتتىق ەكپە كۇنتىزبەسى بويىنشا 2 جاستاعى بالالار 10-11 ەكپە قابىلداۋى ءتيىس. بالا 6 جاسقا تولعاندا ريەۆاكسيناسيا جۇرگىزىلەدى. ودان سوڭ 16 جاسقا تولعانشا ءبىر رەت ەكپە قابىلدايدى.

ايتا كەتۋ كەرەك، بيىل ەكپە قابىلداۋدان قازاقستاندا 12 مىڭ ادام باس تارتقان.