ەلباسى قورىنا جاس ينتەللەكتۋال عالىمدار شوعىرلانىپ جاتىر. بۇل تۋرالى اتالعان قور جانىنداعى جاس عالىمدار كەڭەسىنىڭ ءتوراعاسى، ەكونوميكا عىلىمدارىنىڭ كانديداتى ماحمۋت تومانوۆ ايتتى.

بۇگىن الماتى قالاسىندا ق ر تۇڭعىش پرەزيدەنتى - ەلباسى قورى عيماراتىندا ەكى كۇندىك «يننوۆاسيالىق دامۋ جانە قازىرگى قازاقستانداعى عىلىمعا دەگەن سۇرانىس» تاقىرىبىمەن ءحى حالىقارالىق كونفەرەنسيا باستالدى. جيىنعا رەسەي، قىرعىزستان، يتاليا، اۆستريا، جۇڭگو سىندى ەلدەردەن جانە قازاقستان وڭىرلەرىندەگى جوعارعى وقۋ ورىندارىنان 200-گە جۋىق جاس عالىم كەلدى. جيىندا باستى بايانداما جاساعان قور جانىنداعى جاس عالىمدار كەڭەسىنىڭ ءتوراعاسى ماحمۋت تومانوۆ باسقوسۋدىڭ نەگىزگى مىندەتتەرىنە توقتالدى. 

«كونفەرەنسيا ماقساتى - جاس تالانتتاردى تابۋ. ولاردىڭ عىلىمي ىزدەنىستەرى سورەلەردە قالىپ قويماي، جۇزەگە اسسىن دەپ ويلايمىز. عالىمداردىڭ جۇمىسى بويىنشا جيناق جارىققا شىعادى. ءبىزدىڭ كونفەرەنسيامىز ەۋرازيا اۋماعىنداعى جاس عالىمدار اراسىندا تانىمال. جاس عالىمدار اراسىندا ءتۇرلى حالىقارالىق عىلىمي كونفەرەنسيالارعا، ستارت-اپتارعا قاتىسىپ، بيىكتەردەن كورىنىپ جۇرگەندەرى بار. مىسالى، ءبىزدىڭ ينتەللەكتۋال جاستارىمىز قازىرگى تاڭدا «گۋگل»، «بۋكينگ» سىندى ءىرى حالىقارالىق كومپانيالاردا ءوز ءبىلىمىن دالەلدەدى. قازىرگى ۋاقىتتا تۇڭعىش پرەزيدەنت قورى جانىندا ينتەللەكتۋال جاستاردىڭ قاۋىمداستىعى شوعىرلانىپ كەلەدى دەسەك بولادى. ەلباسى ءبىر سوزىندە مەملەكەتىمىزدىڭ دامىعان 30 ەلدىڭ قاتارىنا ەنۋى ءۇشىن ينتەللەكتۋال جاستاردىڭ كومەگى قاجەتتىگىن ايتقان بولاتىن»، - دەدى م.تومانوۆ.

جيىندا 6 سەكسيا جۇمىس ىستەيتىن بولادى. وندا تاريح، ارحەولوگيا، لاتىن ءالىپبيى سىندى تاقىرىپتار بويىنشا شەبەرلىك ساباقتارى وقىتىلادى. ۇيىمداستىرۋشىلاردىڭ ايتۋىنشا، جيىن «رۋحاني جاڭعىرۋ» باعدارلاماسى اياسىندا ءوتىپ وتىر.

ەكى كۇندىك كونفەرەنسيا اياسىندا ن.نازاربايەۆتىڭ «بولاشاققا باعدار: رۋحاني جاڭعىرۋ» ماقالاسىن تالقىلاۋعا ارنالعان «رۋحاني جاڭعىرۋ جانە ۇلتتىق تاريحتىڭ وزەكتى ماسەلەلەرى» اتتى دوڭگەلەك ۇستەل وتەدى.

كونفەرەنسيا بارىسىندا عىلىمي يننوۆاسيالىق جوبالار كورمەسى مەن مەكتەپ وقۋشىلارى اراسىندا روبوتوتەحنيكادان جارىس ءوتتى. ماحمۋت تومانوۆ جاس عالىمداردىڭ ەڭبەگى بيزنەس قاۋىمداستىقتىڭ نازارىندا ەكەنىن ايتتى. 

«ءبىز «اتامەكەن» كاسىپكەرلەر پالاتاسىمەن تىعىز ىنتىماقتاستىق ورناتقانبىز. ونەرتاپقىش ستۋدەنتتەر اراسىندا بايقاۋلار ۇيىمداستىرعاندا قازىلار القاسىنىڭ قۇرامىنا بيزنەس قاۋىمداستىق وكىلىن كىرگىزۋگە تىرىسامىز. سەبەبى، كاسىپكەرلەردىڭ ءوزى جاس عالىمداردىڭ يننوۆاسيالىق جوبالارىن باعالاپ، ونىڭ بولاشاعىنا جول اشا الادى. مىسالى ءبىزدىڭ جاس عالىمىمىز ادامنىڭ ءتۇرىن تانيتىن جۇيە ويلاپ تاپتى. ول باتىس ەلدەرى وندىرگەن بالاماسىنان 3 ەسە ارزانعا ءتۇستى»،- دەدى ماحمۋت تومانوۆ.

كونفەرەنسيانىڭ ەكىنشى كۇنى، 24 قاراشادا قازاقستاننىڭ الەۋمەتتانۋشىلارىنا ارنالعان شەبەرلىك ساباقتارى وتەدى.