قازاق ءتىلىنىڭ لاتىن الىپبيىنە كوشەتىنىن ەستىگەندە قازاقستانداعى بارلىق وزبەك اعايىن قاتتى قۋاندى. الماتى قالاسىنداعى دوستىق ۇيىندە 25 قاراشادا وتكەن دوڭگەلەك ۇستەلدە وزبەك ۇلتتىق مادەني ورتالىعىنىڭ ءتوراعاسى ابدۋللا يسماتۋللايەۆ وسىلاي ايتتى.

الماتىداعى دوستىق ۇيىندە «رۋحاني جاڭعىرۋ» باعدارلاماسى اياسىندا قازاق ءتىلىنىڭ لاتىن الىپبيىنە كوشۋى ماسەلەسىنە ارنالعان وزبەك مادەني ورتالىعى مۇشەلەرىنىڭ قاتىسۋىمەن دوڭگەلەك ۇستەل ءماجىلىسى ءوتتى. وعان قازاقستان حالقى اسسامبلەياسىنداعى ەتنو-مادەني بىرلەستىك باسشىلارى مەن مۇشەلەرى قاتىستى. جيىندا باستى بايانداما جاساعانداردىڭ ءبىرى وزبەك ۇلتتىق مادەني ورتالىعىنىڭ ءتوراعاسى ابدۋللا يسماتۋللايەۆ لاتىن الىپبيىنە ءوتۋ تۇركى تىلدەس باۋىرلاردىڭ قارىم-قاتىناسىن كۇشەيتە تۇسەتىنىن ايتتى.     

«پرەزيدەنتىمىز ايتقان «رۋحاني جاڭعىرۋ» ماسەلەسىن بۇگىن قازاقستانداعى وزبەك ەتنو-مادەني بىرلىستىگى مۇشەلەرىمەن تالقىلاۋ ءۇشىن باس قوسىپ وتىرمىز.  حالىقتىڭ پىكىرىن تىڭدادىق. قازاقستانداعى وزبەكتەر لاتىن الىپبيىنە كوشۋدى قوس قولداپ قۇپتاپ وتىر.  وزبەكستان حالقى لاتىن الىپبيىنە وسىدان 20 جىل بۇرىن وتكەن بولاتىن. ولاردىڭ باسىنان وتكەن تاجىريبەسىن زەردەلەپ، كورگەن قيىندىقتارىنان ساباق الۋ ماسەلەسىن ايتتىق. سونىمەن قاتار، تۇركىمەن، ازەربايجان، تۇرىك باۋىرلارىمىزبەن قارىم-قاتىناسىمىزدى دامىتا تۇسەدى دەگەن سەنىمدەمىز»، - دەدى قازاقستانداعى وزبەك ۇلتتىق مادەني ورتالىعىنىڭ ءتوراعاسى ابدۋللا يسماتۋللايەۆ.

سونداي-اق ول لاتىن ءالىپبيى وقۋلىق ماسەلەسىندە دە وتانىمىزداعى وزبەك اعايىنداردىڭ تۇيتكىلدى ماسەلەسىن شەشەتىنىن ايتتى.

«قازاقستانداعى وزبەك مەكتەپتەرىنىڭ ۇلكەن ماسەلەسىنىڭ ءبىرى ءالىپبي ايىرماشىلىعىندا ەدى. وقۋشىلارىمىز وزبەك تىلىندەگى ادەبيەتتەردى وقۋدا قينالاتىن. ال ەندى قازاق ءتىلى لاتىن الىپبيىنە وتسە، وسى ولقىلىقتىڭ ورنى تولار ەدى. بىر-ەكى ارىپتەگى وزگەشەلىك ول اسا قيىندىق تۋعىزباس. سوندىقتان، وزبەك حالقى لاتىن الىپبيىنە ءوتۋ تۋرالى جاڭالىقتى ەستىگەن كۇننەن باستاپ، ونى قۋانا قولدادى»، - دەدى قازاقستانداعى وزبەك ۇلتتىق مادەني ورتالىعىنىڭ ءتوراعاسى ابدۋللا يسماتۋللايەۆ.