الماتىدا مانشۇك مامەتوۆا اتىنداعى №28 مەكتەپ-ليسەيدە «بولاشاققا باعدار: رۋحاني جاڭعىرۋ» ماقالاسىنداعى مىندەتتەر شەڭبەرىندە مانشۇك مامەتوۆانىڭ 95 جىلدىعىنا ارنالعان ءمۇسىن اشىلدى.

سالتاناتتى شاراعا وستاۆكاداعى پولكوۆنيك، الماتى قالاسىنىڭ قۇرمەتتى ازاماتى، كورنەكتى مەملەكەت جانە قوعام قايراتكەرى، مانشۇك مامەتوۆانىڭ مايدانداسى  سۇلتان سۇلەيمەن ۇلى جيەنبايەۆ، مانشۇك مامەتوۆانىڭ مايدانداسى، 100-باتالوننىڭ تەلەفونيسى، قازكسر حالىق اعارتۋ ءىسىنىڭ ۇزدىگى، ءبىلىم بەرۋ مەن پەداگوگيكا سالاسىنداعى ەڭبەگى ءۇشىن ىبىراي التىنسارين مەدالىنىڭ يەگەرى اتانعان بەكبوسىن يساتاي ۇلى كەرەيەۆ، مانشۇك مامەتوۆانىڭ ءسىڭلىسى ايمان مامەتوۆا قاتىستى.

ءمۇسىن اۆتورى – تىلەۋبەردى بيناشيەۆ.

ايتا كەتۋ كەرەك، كەڭەس وداعىنىڭ باتىرى مانشۇك مامەتوۆا بۇل مەكتەپتە 1931-38 جىلدارى ءبىلىم العان بولاتىن. اتالعان مەكتەپتەن مايدان الاڭىنا مەكتەپ ديرەكتورى گەنناديي زۆانسيەۆ باستاعان 120 وقۋشى مەن وقىتۋشى اتتانعان. سولاردىڭ ىشىنەن 3 ادام: ۆلاديمير زاسدكو، ۆلاديمير برەۋسوۆ، مانشۇك مامەتوۆا كەڭەس وداعىنىڭ باتىرى اتاندى.

مانشۇك مامەتوۆانىڭ مايدانداسى سۇلتان سۇلەيمەن ۇلى جيەنبايەۆ مايدان جىلدارىن بىلاي ەسكە الدى.

«مەكتەپ باسشىلىعىنا ريزالىعىمدى بىلدىرگىم كەلەدى. ۇجىم ەشقاشان مانشۇك قىزدى ەستەن شىعارعان ەمەس. مۇندا مۋزەي اشتى، ەسكەرتكىش تۇرعىزدى، بۇگىن ءمۇسىنىن اشىپ جاتىر. ءبىز 100 بريگادانىڭ اسكەريلەرى العىس بىلدىرەمىز. مانشۇك مايدانعا 6 رەت سۇرانىپ، اتتانعان. 18 جاستاعى قارشاداي قىز قالىڭ وتتىڭ اراسىنا قورىقپاي بارىپ، جارالى ساربازداردى سۇيرەپ شىعاتىن. مەن ەڭ العاش جارالانعاندا ول مەنىڭ جارامدى تاڭىپ، سانيتارلىق باتالونعا سالىپ جىبەرگەن. ءبارىمىز بىرگە نيەۆەل قالاسىنىڭ تۇبىندە شايقاستىق. مانشۇك 21 جاسىندا جارىقشاق ءتيىپ كوز جۇمدى. قازاقستاننان بارعان 100 ادامنىڭ تەك 37ء-ى عانا ءتىرى ورالدى»، – دەدى ول.

قاريانىڭ ايتۋىنشا، مانشۇكتىڭ سوعىسقا بارعانداعى ماقساتى 1937 جىلى جازىقسىز اتىلىپ كەتكەن اكەسىن اقتاپ الۋ بولعان ەكەن. ۇلى وتان سوعىسى جىلدارىندا مەكتەپ ديرەكتورى گەنناديي فادەيەۆيچ زۆانسيەۆ باستاعان وسى مەكتەپتىڭ 120 وقۋشىسى مەن ءمۇعالىمى سوعىس دالاسىنا اتتانعان. مايداندا كورسەتكەن ەرلىگى ءۇشىن مەكتەبىمىزدىڭ وقۋشىلارى ۆلاديمير زاسيادكوعا، ۆلاديمير برەۋسوۆكە، مانشۇك مامەتوۆاعا كەڭەس وداعىنىڭ باتىرى اتاعى بەرىلدى.

1978 جىلى مەكتەپتە مايدان داڭقىنا ارنالعان مۋزەي جاسالدى. مۋزەيدى مانشۇكتىڭ اناسى ءامينا سۇلەيمەن قىزى اشتى. 1978 جىلى قۇرىلعان مۋزەي وقۋشىلاردى وتانسۇيگىشتىككە تاربيەلەۋدە ماڭىزدى ءرول اتقارادى. مۇعالىمدەر مەن وقۋشىلاردىڭ ءوز قولىمەن جاساعان مۇراجايى – وتان ءۇشىن وپات بولعان ۇرپاقتىڭ الدىنداعى پارىزىن وتەۋدىڭ كورىنىسى ىسپەتتەس. قاسىق قانى قالعانشا جەرى ءۇشىن كۇرەسكەن باتىرلارىمىز ءبىزدىڭ سانامىزدا ماڭگىلىك جاسايدى.

مۇراجايعا ۇلى وتان سوعىسى جىلدارىنداعى ءۇشبۇرىش حات، رەسمي قۇجاتتار، فوتوسۋرەتتەر سياقتى ءارتۇرلى قۇندى ەكسپوناتتار قويىلعان. بۇل جەردە قارۋ، سنارياد، ءارتۇرلى وقتار، سوعىس بولعان جەردەن اكەلىنگەن توپىراق ساقتاۋلى.