كوكشەتاۋ قالاسىندا مادەنيەت جانە تىلدەردى دامىتۋ ءبولىمىنىڭ ۇيىمداستىرۋىمەن ەلباسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىنىڭ «رۋحاني قازىنا» كىشى باعدارلاماسىن ىسكە اسىرۋ اياسىندا ايماقتىق اقىندار ايتىسى ءوتتى، دەپ حابارلايدى Qamshy.kz اقپارات اگەنتتىگى اقمولا وبلىسى ىشكى ساياسات باسقارماسىنىڭ وڭىرلىك كوممۋنيكاسيالار قىزمەتىنە سىلتەمە جاساپ.

ايتىسقا كوكشەتاۋ، استانا، اقتوبە، پەتروپاۆل، قوستاناي، قاراعاندى جانە سەمەي قالالارىنىڭ جاس اقىندارى قاتىسىپ، ەل الدىندا ب ا ق سىناعان.

ءىس-شارا «قازاقستان رەسپۋبليكاسىندا تىلدەردى دامىتۋ مەن قولدانۋدىڭ 2011-2020 جىلدارعا ارنالعان مەملەكەتتىك باعدارلاماسىن» جۇزەگە اسىرۋ، سونداي-اق قازاق حالقىنىڭ اۋىزەكى ونەرىن دامىتا وتىرا، جاڭا سۋىرىپ سالما اقىنداردى انىقتاۋ، جاس اقىنداردىڭ شىعارماشىلىق باستاماسىنا قولداۋ كورسەتۋ ماقساتىندا وتكىزىلدى.

ايتا كەتكەن ءجون، اقىندار «بولاشاققا باعدار: رۋحاني جاڭعىرۋ» باعدارلامالىق ماقالاسىندا ايتىلعان «ءححى عاسىرداعى ۇلتتىق سانا تۋرالى» باعىتتارى، ۇلتتىق كود، ۇلتتىق مادەنيەت، «100 جاڭا ەسىم» ماسەلەلەرىن قوزعاپ، ەل ءۇشىن ەڭبەك ەتكەن تاريحي تۇلعالاردىڭ ءومىرى مەن ەرلىكتەرى جايلى تاقىرىپتاردى ورتاعا سالدى.

مادەني شارانىڭ دەمەۋشىلەرى «اپ-يمپەكس» جشس-نىڭ ديرەكتورى جۇماباي اميرجانوۆ پەن «زەلەنستروي» جشس-نىڭ ديرەكتورى گەنناديي وسينەنكو. ال جۇرگىزۋشىسى – بەلگىلى ايتىسكەر-اقىن ارمان بەردالين بولدى.

قازىلار القاسىنىڭ شەشىمى بويىنشا باس جۇلدەنى قاراعاندى قالاسىنان بوتاكوز مۇحيدەن السا، ءى ورىن پەتروپاۆلدان كەلگەن ماقسات سەرىككە تيەسىلى بولدى. ال ءىى ورىندى اقتوبەلىك نارتاي تىلەۋقۇل مەن كوكشەتاۋلىق ايتىسكەر مۇحامەد قونقايەۆ ەنشىلەگەن. قوستانايلىق نۇرسۇلتان قاسىم مەن قىزىلوردالىق تورەحان سوۆەت ءىىى ورىندى ءوزارا ءبولىسىپ العان.

سونىمەن قاتار، بەلسەندى قاتىسقانى ءۇشىن كوكشەتاۋ قالاسىنان نۇريسلام ءابدىل مەن ەلوردادان كەلگەن اقىن ارداكەرەي كاپ العىس حاتتارمەن ماراپاتتالدى.