ءماجىلىس ءتوراعاسى نۇرلان نىعماتۋلين ۇلىبريتانيا جانە سولتۇستىك يرلانديا بىرىككەن كورولدىگىنىڭ قازاقستانداعى توتەنشە جانە وكىلەتتى ەلشىسى كەرولين براۋندى ديپلوماتيالىق مەرزىمىنىڭ اياقتالۋىنا بايلانىستى قابىلدادى دەپ حابارلايدى Qamshy.kz اقپارات اگەنتتىگى. 

ن. نىعماتۋلين اتاپ وتكەندەي، ك. براۋن ءبىزدىڭ ەلدەرىمىزدىڭ اراسىنداعى ەكىجاقتى، سونىڭ ىشىندە، پارلامەنتارالىق قارىم-قاتىناستى تەرەڭدەتۋ جولىندا ەسەلەي ەڭبەك ەتتى. ناتيجەسىندە قازاقستان مەن ۇلىبريتانيا اراسىنداعى ستراتەگيالىق ارىپتەستىك قارقىندى دامىدى.

سونىمەن بىرگە براۋن حانىم، تەك ساياسي، مادەني، حالىقارالىق بايلانىستاردى نىعايتىپ قانا قويماي، ءاربىر ۇلتتىق مەيرامداردا قازاق تىلىندە جۇرەكجاردى لەبىزىن جەتكىزىپ، مەملەكەتتىك تىلگە دەگەن ەرەكشە قۇرمەتىن كورسەتتى.

ن. نىعماتۋلين ەلشى حانىمنىڭ شىن مانىندە جوعارى ديپلوماتيالىق تاجىريبەسى وزگەلەرگە ۇلگى بولۋعا لايىقتى ەكەنىن اتاپ ءوتتى.

ءوز كەزەگىندە كەرولين براۋن قازاقستاندا ەڭبەك ەتكەن جىلدار ومىرىندەگى ەڭ ەلەۋلى كەزەڭدەردىڭ ءبىرى ەكەنىن ايتىپ، جالپى ەڭبەك  جولىنىڭ قازاقستانداعى ەلشىلىك قىزمەتپەن اياقتالاتىنىنا ريزا ەكەندىگىن جەتكىزىپ، العىس ءبىلدىردى. 

ايتا كەتەيىك، كەرولين براۋن ءبىزدىڭ ەلىمىزدە 4 جىل قىزمەت ەتتى.