التىنشى سىنىپتا وقيتىن الماتىلىق وقۋشى ميراس كوشەربايەۆ شاعىن قۇس فابريكاسىن اشىپ، جەكە كاسىبىن باستادى، دەپ حابارلايدى «قازاقپارات» حاا ءتىلشىسى. ميراس ءار كۇن سايىن ءوزىنىڭ قۇس فابريكاسىنىڭ جۇمىسىن تەكسەرىپ بارىپ قانا مەكتەپكە جول تارتادى. بۇل تۋرالى Qamshy.kz اقپارات اگەنتتىگى قازاقپاراتقا سىلتەپ جازادى. 

جاس تا بولسا جالىندى ورەن «تاmوs» فيزيكا-ماتەماتيكا باعىتىنداعى مەكتەپتىڭ 6-شى سىنىپ وقۋشىسى. جاس بالا كىشكەنتاي كەزىنەن-اق كۆادراسيكل ساتىپ الۋدى ارمانداعان ەكەن. ميراستىڭ اجەسى نەمەرەسىنە كۆادراسيكلدى ساتىپ الۋعا «اقشانى ءوزىڭ تاۋىپ الساڭ قالاي؟» دەپ ۇسىنىس ءبىلدىرىپتى.

ءتىپتى اجەسى كاسىپ باستاۋ ءۇشىن العاشقى قارجىنى نەمەرەسىنىڭ قولىنا ۇستاتىپ، اقىرى ميراس بۇل جۇمىسقا ۇلكەن جاۋاپكەرشىلىكپەن كىرىسىپ كەتكەن. «ءۇيدىڭ اۋلاسىندا بوس جاتقان ۇلكەن الاڭ بار. ميراس ءوزىنىڭ كاسىبى ءۇشىن وسى اۋماقتى پايدالانۋدى شەشتى. جازعى دەمالىسىندا فازەندادا اكەسىنە كومەكتەستى. اكەسى مال ۇستاپ، كوپ بولماسا دا تاۋىق اسىرايتىن ەدى. وسى سەبەپتى، ميراس تاۋىق اسىراۋعا ماقساتتى تۇردە كىرىستى»، - دەيدى جاس كاسىپكەردىڭ اپكەسى گۇزال ساعىنتايەۆا.

جاڭاسىن ساتىپ الۋعا قالتاسى كوتەرمەگەندىكتەن، ميراس بالاپانداردى اسىراۋعا ارنالعان برۋدەرلەردىڭ (جىلى ورىنعا قويىلاتىن قوراپ) سىزباسىن ينتەرنەتتەن كورىپ، بالاپاندارعا ارنالعان جىلى «مەكەنجايدى» ءوز قولىمەن جاساپ العان. «ميراستىڭ كاسىبى وسىلاي ىلگەرى باستى. الدىمەن 100 بالاپان ساتىپ الدى. بۇل ونىڭ ءبىرىنشى پارتياسى بولاتىن. قاجەتتى جەمدى ءار ءتۇرلى جەتكىزۋشىلەردەن الدى. بالاپاندارعا تالاپقا ساي كەلەدى دەگەن جەمدى بەردى. تاۋىقتارعا انتيبيوتيك نەمەسە گارمونداردان تىس، تەك ەكولوگيالىق تازا جەم تۇرلەرىن بەرەدى.

45-50 كۇن اسىراعاننان كەيىن تۋىستارىنا ساتادى. ءبىرىنشى پارتيادان تۇسكەن اقشاعا ميراس تاعى 200 بالاپان ساتىپ الدى»، - دەيدى گۇزال ساعىنتايەۆا. ءقازىر بالا كاسىپكەر ءتىپتى ءبىر ادامدى جۇمىسقا ورنالاستىرىپ قويىپتى. ماقساتى - تاۋىقتىڭ سانىن مىڭعا جەتكىزىپ، قاز، ۇيرەك، كۇركەتاۋىق سەكىلدى وزگە دە ءۇي قۇستارىن ءوسىرۋ.

سونىمەن بىرگە، ميراس اۋىل شارۋاشىلىعى ونىمدەرىن ساۋدالايتىن جەكە دۇكەنىن اشۋدى كوزدەپ وتىر. «ميراستىڭ كىشكەنە كەزىنەن ەڭبەككە دەگەن قۇلشىنىسى ەرەكشە. ءوزى دە مال باعىپ وسكەن بالا. اتامىز بەلگىلى اگرونوم شىنىبەك ءبارىمىزدى جازدا اۋىلداعى جۇمىسقا كومەك قولىن سوزۋعا ۇيرەتكەن. وتباسىمىزدىڭ ەڭبەككە اۋەس بولۋىنىڭ سەبەبى سول اتامىزدىڭ تاربيەسى دەپ ويلايمىن»، - دەيدى گۇزال ساعىنتايەۆا.