اقش فەدەرالدىق تەرگەۋ بيۋروسى (فبر) اگەنتتەرى سان-فرانسيسكو قالاسىنداعى تۋريستىك نىسانعا شابۋىل جاساماقشى بولعان دەگەن كۇدىكپەن ەر ادامدى تۇتقىنداعان. پروكۋراتۋرا وكىلدەرىنىڭ بولجامى بويىنشا، كاليفورنيا شتاتىنداعى مودەستو قالاسىندا تۇراتىن 26 جاستاعى ەۆەريتت دجەيمسون "جيحادشىلار يدەياسىن جاقتاپ، روجدەستۆو مەرەكەسى كۇنى شابۋىل جاساۋدى جوسپارلاعان"، دەپ Qamshy.kz اقپارات اگەنتتىگى ازاتتىققا سۇيەنىپ جازادى. 

دجەيمسونعا وزدەرىن "جيحادشىلارمىز" دەپ تانىستىرعان فبر اگەنتتەرى ونىمەن بىرنەشە رەت بايلانىسقان. كۇدىكتى سان-فرانسيسكودا جۇرت كوپ باراتىن جاعالاۋدا ورنالاسقان تۋريستىك اۋداندا جارىلىس جاساپ، كەيىن ادامدارعا اۆتوماتتىق قارۋدان وق اتۋ جوسپارىمەن بولىسكەن. ايىپتاۋ قورىتىندىسىندا دجەيمسوننىڭ "تەراكت جاساۋدى جوسپارلاعان اۋداندى جاقسى بىلەتىنى" جانە ول جەردە ۇنەمى ادام كوپ جۇرەتىنىنە سەنىمدى بولعانى ايتىلعان. سونىمەن بىرگە كۇدىكتى شابۋىلدان سوڭ ەشقايدا قاشپاي، "ءولىمدى قابىلداۋعا دايىن" ەكەنى تۋرالى مالىمدەگەن.

ءبىراق كەيىن فبر اگەنتىمەن تەلەفون ارقىلى سويلەسكەن كەزدە دجەيمسون شابۋىل جاساۋ قولىنان كەلەتىنىنە كۇماندى ەكەنىن ايتىپ، اۋەلگى ويىنان اينىپ قالعانىن جەتكىزگەن.

كۇدىكتىنىڭ ءۇيىن ءتىنتۋ كەزىندە اتىس قارۋى مەن ءوق-دارى، سونىمەن بىرگە الدىن الا ازىرلەگەن وسيەتى تابىلعان. وسيەتىندە ول اقش پرەزيدەنتى دونالد ترامپتى يەرۋساليمدى ءيزرايلدىڭ استاناسى دەپ تانۋ تۋرالى شەشىمى ءۇشىن ايىپتاعان.

جۇما كۇنى فەدەرالدىق سوتتا ەۆەريتت دجەيمسوننىڭ قورعاۋشىسى كۇدىكتىگە تاعىلىپ وتىرعان ايىپتاردى جوققا شىعاردى. كۇدىكتىنىڭ اكەسى ۇلىنىڭ "تەراكتىگە دايىندالعانى" تۋرالى اقپاراتقا سەنگىسى كەلمەيتىنىن ايتقان.

2009 جىلى دجەيمسون تەڭىز جاياۋ اسكەرى كورپۋسىندا قىسقا دايىندىق كۋرسىنان وتكەن. ءبىراق دەنساۋلىعىنا قاتىستى مالىمەتتى – دەمىكپە اۋرۋىنا شالدىققانىن جاسىرىپ قالعانى انىقتالعان سوڭ بوساتىلعان.

بۇعان دەيىن "يسلام مەملەكەتى" ەكسترەميستىك توبى ءوز جاقتاستارىن باتىس ەلدەرىندە روجدەستۆو مەرەكەسى كەزىندە تەررورلىق شابۋىلدار جاساۋعا شاقىرعان.