قازاق مەملەكەتتىك سيركىندە الماتى قالاسانىڭ اكىمى اتىنان جاڭا جىلدىق شىرشا ءوتىپ، وعان 1700–دەن استام بالا – وقۋ وزاتتارى، بالالار ۇيلەرىنىڭ تاربيەلەنۋشىلەرى، تۇرمىسى تومەن وتباسىلار بالالارى مەن مۇمكىندىگى شەكتەۋلى بالدىرعاندار قاتىستى.
كىشكەنتاي قالالىقتاردى كەلە جاتقان جاڭا جىلمەن قۇتتىقتاۋ ءۇشىن مەرەكەلىك شاراعا الماتى اكىمى باۋىرجان بايبەك كەلدى.
«ءبىز ۇنەمى جاس الماتىلىقتاردىڭ جەتىستىكتەرى تۋرالى ۇلكەن ماقتانىشپەن ايتامىز. سەندەر جىل سايىن حالىقارالىق وليمپيادالاردا، عىلىمي جوبالار كونكۋرستارىندا ۇلكەن ماراپاتتارعا يە بولىپ كەلەسىڭدەر. تەك 2017 جىلدىڭ وزىندە عانا الماتىلىق وقۋشىلار 61 التىن، 76 كۇمىس، 90 قولا مەدالداردى جەڭىپ الدى. مەملەكەت ءوز كەزەگىندە سەندەرگە ۇنەمى قامقورلىق كورسەتۋدە، ۇزدىك ءبىلىم الىپ، جان- جاقتى جەتىلىپ ءوسۋ ءۇشىن بارلىق جاعدايلاردى جاساۋدا. وسىنىڭ بارلىعى سەندەردىڭ اقىلدى، دەنساۋلىعى مىقتى ۇرپاق بولىپ قانا قويماي، قازاقستاندى سۇيۋگە، ونى الەمگە تانىتۋلارىڭا ىقپال ەتەدى، ال ءبىز سەندەر ءۇشىن ماقتاناتىن بولامىز. مەن بۇگىن سەندەرگە جۇرەكتەرىنىڭ جىلۋىن ۇسىنىپ، مەرەكەلىك كونسەرتكە قاتىسقان بارلىق كىشكەنتاي ارتيستەرگە العىس ايتامىن»، - دەپ اتاپ ءوتتى الماتى اكىمى.
باۋىرجان بايبەك دانەليا تۋلەشوۆانى ۋكرايندىق «گولوس. ءدىتي» شوۋىنداعى جەڭىسىمەن قۇتتىقتادى.
«ءار بالانىڭ جەتىستىگى - بۇل بارشا ەلىمىزدىڭ جەتىستىگى. دانەليا، بارلىق قازاقستاندىقتار سەن ءۇشىن ماقتانادى. ساعان زور تابىستار تىلەيمىن، دارىندى بالادان الەمدىك دەڭگەيدەگى جۇلدىزعا اينالۋىڭا تىلەكتەسپىن. مەن سەنىڭ اناڭ ەلەنانى دا قۇتتىقتايمىن. ءار بالا جەڭىسىنىڭ ارتىندا اتا - انالاردىڭ، اسىرەسە ونىڭ اناسىنىڭ زور ەڭبەگى تۇرادى»، - دەدى باۋىرجان بايبەك.
بالالار ءۇشىن «جاڭا جىلدىق عاجايىپتار» دەپ اتالاتىن مەرەكەلىك باعدارلامانى سيرك ارتيستەرى دايىندادى، لازەر شوۋىنىڭ جارىعىمەن ۇيرەتىلگەن اڭدار، اكروباتتار، جونگلەرلەر، كلوۋندار جانە باسقالارى ونەر كورسەتتى.
مەرەكەلىك شارا بارىسىندا قالا اكىمىنىڭ اتىنان كىشكەنتاي قوناقتارعا سىيلىقتار، سونىڭ ىشىندە اتا- انالارى بالالارىن باقىلاپ وتىراتىن ەلەكتروندى جۇيەدەگى GPS-ساعاتتار، كەڭسە تاۋارلارى، دامۋ ويىندارى، جۇمساق ويىنشىقتار، گراتتاج بەن سۋرەتشىلەر ءۇشىن جيىنتىقتار، ءتاتتى سىيلىقتار جانە باسقالارى تاپسىرىلدى.
