27 جەلتوقساننان باستاپ ۋكراينا مەن رەسەي شەكاراسىنداعى بىرنەشە پۋنكتتە بيومەتريكالىق قاداعالاۋ جۇيەسى ورناتىلادى دەپ حابارلادى Facebook-تە ۋكراينا ىشكى ىستەر ءمينيسترىنىڭ كەڭەسشىسى زوريان شكيرياك. ول شەكارانىڭ زاڭ بۇزۋشىلار مەن كونترابانداشىلار كوپ وتەدى دەگەن جەرلەرىندە ءموبيلدى بيومەتريكالىق قاداعالاۋ كەشەندەرى ورناتىلاتىنىن ايتتى، دەپ Qamshy.kz اقپارات اگەنتتىگى ازاتتىققا سىلتەپ جازادى. 

ۋكراينا پرەزيدەنتى پەتر پوروشەنكو بيىل 1 قىركۇيەكتە 2018 جىلدىڭ 1 قاڭتارىندا ۋكراينانىڭ شەكارا پۋنكتەرىندە بيومەتريكالىق مالىمەتتەردى تەكسەرۋ جۇيەسى جۇمىس ىستەۋى ءتيىس ەكەنىن مالىمدەگەن. كييەۆ ۋكراينا قاۋىپسىزدىگىنە قاتەر توندىرەدى دەپ سانايتىن كەيبىر ەلدەردىڭ ازاماتتارى شەكارادان بيومەتريكالىق ءتولقۇجات ارقىلى وتەدى. ەگەر بيومەتريكالىق ءتولقۇجاتى بولماسا، وندا شەكارادا شەتەلگە شىعۋ ءتولقۇجاتىنا بيومەتريكالىق مالىمەتتەر ەنگىزىلمەك.