پاۆلودار اۋدانىنداعى اۋىلدىق وكرۋگنىڭ اكىمى باقتاشىمەن ۇرىسىپ سويلەسىپ، مەملەكەتتىك قىزمەتشىنىڭ ەتيكالىق مادەنيەتىن ساقتاماعانى ءۇشىن ەسكەرتۋ الدى، دەپ حابارلايدى pavlodarnews.kz ءتىلشىسى.

بۇل تۋرالى وڭىرلىك كوممۋنيكاسيالار قىزمەتىندە وتكەن بريفينگ بارىسىندا پاۆلودار وبلىسى اكىمى اپپاراتىنىڭ ەتيكا بويىنشا وكىلەتتى يۋريي فەلدمان ايتتى.

- 2017 جىلعى 1-جەلتوقسانداعى ستاتيستيكاعا سايكەس جەرگىلىكتى اتقارۋشى ورگاننىڭ 486 مەملەكەتتىك قىزمەتشىسى تارتىپتىك جاۋاپكەرشىلىككە تارتىلعان، - دەيدى يۋريي فەلدمان. – ونىڭ ىشىندە ەتيكا نورماسىن بۇزعاندار سانى – 20، قىزمەتتىك ءتارتىپتى بۇزعاندار – 110 جانە باسقا دا بۇزۋشىلىقتارعا جول بەرگەن 356 ادام بار. ادەپ جونىندەگى كوميسسيا جانە كەڭەستىڭ ۇسىنىستارى بويىنشا جەرگىلكتى اتقارۋشى ورگاننىڭ 44 قىزمەتشىسىنە تارتىپتىك جازا قولداندى. ناقتىراق ايتساق، ادەپ كودەكسىنىڭ نورمالارىن بۇزعانى ءۇشىن – 14، مەملەكەتتىك قىزمەتتىڭ ابىرويىنا نۇقسان كەلتىرگەنى ءۇشىن – 11، باسقا بۇزۋشىلىقتارعا قاتىستى 19 قىزمەتشى ءوز جازاسىن الدى.

ەتيكا بويىنشا وكىلەتتى سپيكەردىڭ سوزىنە سۇيەنسەك، مەملەكەتتىك ورگانداردىڭ قىزمەتىنە قاتىستى بارلىق پروبلەمالىق ماسەلەلەر بويىنشا وقيعا ورنىنا شىعۋ ارقىلى تەكسەرىس جۇرگىزىلگەن. وسىلايشا، ۋسپەن (جەر قاتىناستارى ماسەلەسى)، ماي (اۋدان اكىمىنىڭ جۇمىسىن سىنعا الۋ)، جەلەزين (ميحايلوۆ، ەڭبەكشى اۋىلدىق وكرۋگتەرى تۇرعىندارىنىڭ اكىمدەرىنە ۇجىمدىق شاعىم جاساۋى)، لەبياجى (اۋداندىق ءبىلىم بەرۋ بولىمىندەگى مورالدىق-پسيحولوگيالىق احۋالعا شاعىم جانە ت.ب.) اۋداندارىنا جۇمىس ساپارلارى جاسالدى.

- ماسەلەن، پاۆلودار اۋدانىنىڭ تۇرعىنى حابارلاسىپ اۋىل اكىمىنىڭ باقتاشىمەن دورەكى سويلەسكەنىن جەتكىزدى. وسىعان بايلانىستى اۋىل باسشىسىنا ەسكەرتۋ بەرىلدى، - دەدى يۋريي فەلدمان.