قىرعىزستان پارلامەنتىنىڭ دەپۋتاتتارى ءسان كورمەسىندە يتكە قىرعىزدىڭ ۇلتتىق قالپاعىن كيگىزگەن ديزاينەردى جاۋاپقا تارتۋدى تالاپ ەتتى. دەپۋتاتتار ۇلتتىق كيىمدى جانۋار نە ءۇي حايۋانىنا كيگىزۋگە بولمايدى دەپ سانايدى. بۇل تۋرالى Qamshy.kz اقپارات اگەنتتىگى ازاتتىققا سىلتەپ جازادى.
بىشكەكتەگى ءسان ۇلگىسى كەزىندە يتتەرگە ارنالعان كيىم ۇلگىسى دە كورسەتىلگەن. ۇيىمداستىرۋشىلار مەن ديزاينەرلەر ساحناعا قالپاق كيگەن يت شىعارعان. وسىدان كەيىن كەي بەلسەندىلەر يتكە قالپاق كيگىزۋ قىرعىز حالقىن قورلاۋ، ۇلتارالىق ارازدىقتى قوزدىرۋ دەپ ەسەپتەپ، قارسى شىقتى. ەندى بۇل شۋ پارلامەنتكە دە جەتتى.
بەلسەندىلەر بىشكەكتە قارسىلىق شاراسىن ۇيىمداستىرىپ، ءسان كورمەسىن ۇيىمداستىرۋشىلار حالىقتان كەشىرىم سۇراسىن دەپ تالاپ ەتتى. ولار پرەزيدەنتكە، پرەمەر-مينيسترگە، پارلامەنتكە حات جازباق. بەلسەندىلەر يتكە قالپاق كيگىزگەندەر ايىپپۇل تولەۋ كەرەك دەپ سانايدى.
جەلتوقساننىڭ 28ء-ى كۇنى قىرعىزستان پارلامەنتىنىڭ وتىرىسىندا سوسيال-دەموكرات رىسكەلدى مومبەكوۆ باس پروكۋراتۋرا مەن مەملەكەتتىك قاۋىپسىزدىك كوميتەتىنەن بۇل ءىستى تەكسەرۋدى تالاپ ەتتى. مومبەكوۆتى باسقا دا دەپۋتاتتار قولدادى.
"قالانىڭ ورتاسىنداعى ءىرى ساۋدا ورتالىعىنا يتكە قالپاق كيگىزۋ – ۇلتتىق كيىمدى سىيلاماۋ. ۇيىمداستىرۋشىلاردى جاۋاپقا تارتۋ كەرەك. ءيتتىڭ يەسى قانشا كەشىرىم سۇراسا دا ونى جازالاۋ قاجەت، - دەدى دەپۋتات تازابەك يكراموۆ.
دەپۋتات ديزاينەردى، ءيتتىڭ يەسىنە ناقتى قانداي جازا قولدانۋ كەرەكتىگىن ايتپادى.
پارلامەنت جيىنىنا كەلگەن قىرعىزستان پرەزيدەنتى اكىمشىلىگىنىڭ وكىلى بۇل شۋعا قاتىستى ناقتى مالىمدەمە جاسايتىندارى مالىمدەدى.
