بۇگىن 93 جاسقا قاراعان شاعىندا جازۋشى، قازاقستان جازۋشىلار وداعىنىڭ مۇشەسى ءادىھام شىلتەرحانوۆ دۇنيەدەن ءوتتى. بۇل تۋرالى جۋرناليست تورەبەك بايتاسوۆ ءوزىنىڭ فەيسبۋكتەگى پاراقشاسىندا جازدى، دەپ حابارلايدى Qamshy.kz اقپارات اگەنتتىگى.

سوعىس جانە ەڭبەك ارداگەرى ءادىھام شىلتەرحانوۆ 1925 جىلى 27 شىلدەدە وڭتۇستىك قازاقستان وبلىسى، قازىرگى ورداباسى اۋدانىنىڭ «تورتكۇل» اۋىلىندا تۋعان. 

1961 جىلى الماتى اۋىل شارۋاشىلىعى ينستيتۋتىن بىتىرگەن. ەڭبەك جولىن 1943 جىلى تورتكۇلدەگى ورتا مەكتەپتە مۇعالىمدىكتەن باستاعان. 

1943–1944 جىلدارى داڭقتى پانفيلوۆ اتىنداعى 8-گۆارديالىق ديۆيزيانىڭ قۇرامىندا ۇلى وتان سوعىسىنا قاتىناسىپ، ەلگە اۋىر جارالانىپ ورالدى. 

1945–1969 جىلدار اراسىندا بايدىبەك اۋدانىندا ءمۇعالىم، اۋداندىق پارتيا كوميتەتىندە نۇسقاۋشى، كراسنايا-نيۆا ۇجىمشارىندا پارتيا كوميتەتىنىڭ حاتشىسى، ودان كەيىن سول ۇجىمشاردىڭ ءتوراعاسى قىزمەتتەرىن اتقاردى. 

1969–1985 جىلدارى وتىرار اۋدانىنداعى «ارىس» ۇجىمشارىنىڭ ديرەكتورى، اۋداندىق تۇرمىستىق قاجەتتى وتەۋ كومبيناتىنىڭ ديرەكتورى بولىپ جەمىستى ەڭبەك ەتتى. 1985 جىلى زەينەتكەرلىككە شىقتى.

1988 جىلى «جالىن» باسپاسىنان «ءۇش بايتەرەك»، 1993 جىلى «اقجالدىڭ اقىرى»، 1995 جىلى «اتامۇرا» باسپاسىنان «اتالى سوزدەر»، 1995 جىلى «راۋان» باسپاسىنان «ساتتار ەرۋبايەۆ» اتتى كىتاپتارى جارىق كوردى.

2000 جىلى «ورداباسى» باسپاسىنان شىعارمالارىنىڭ 2 تومدىعى باسىلىپ شىقتى. قازاق كسر جوعارى كەڭەسى پرەزيديۋمىنىڭ قۇرمەت گراموتاسىمەن، ءى دارەجەلى وتان سوعىسى وردەنىمەن، كوپتەگەن مەدالدارمەن ماراپاتتالعان.