بيىل باس قالامىز 20-جىلدىق مەرەيتويىن اتاپ وتپەك. استانا ءوزىنىڭ سۋىق قىسىمەن ەرەكشەلەنەدى. جاسوتاندىقتار جاڭا 2018 جىلدىڭ ءبىرىنشى جۇمىس كۇنىن قالانىڭ كوممۋنالدى قىزمەتكەرلەرىنە ءسوزدىڭ تۋرا ماعىناسىندا جىلۋ سىيلاۋمەن – تەگىن ءشاي تاراتۋمەن باستادى. جاستار جۇمىس كۇنى اۋا رايى جاعدايىنا قاراماستان تاڭنىڭ اتىسىنان باستالاتىن، ەڭبەگى كۇندەلىكتى ومىردە بايقالمايتىن اۋلا تازالاۋشىلارىنا ەرەكشە قۇرمەت ءبىلدىردى. وسى ورايدا جاستار «كەل، ءشاي ىشەيىك» ميني-فەستى ارقىلى قالا تۇرعىندارىن وزگەلەردىڭ ەڭبەگىن باعالاۋعا شاقىرادى.

دانيار سۇندەتبايەۆ، «جاس وتان» ءتوراعاسى: «قوعامدا ساباعىن ناشار وقىعان بالا وسكەندە اۋلا تازالۋشى بولادى دەگەن ستەرەوتيپ قالىپتاسقان. ءبىزدىڭ ماقسات – سول ۇستانىمدى جوققا شىعارىپ، وسى ماماندىقتىڭ ماڭىزدىلىعىن كورسەتۋ. بۇل ماماندىق يەلەرىنىڭ اراسىندا بىرىمىزگە انا، بىرىمىزگە قارىنداس بولاتىن ايەل ادامدارى دا بار.  جولىمىزدا كەزدەسكەن قىزمەتكەرلەرگە ىزەت تانىتىپ، امانداسىپ، قولىمىزدان كەلگەنشە كومەك كورسەتۋگە شاقىرامىن».

ميني فەست تاڭەرتەڭگى 11-دە باستالىپ، كۇنى بويى جالعاسىن تاپتى. جاسوتاندىقتار شاعىن اۆتوبۋسپەن قالانى ارالاپ، باۋىرساق پەن ءشاي تاراتتى. سونداي-اق، جاستار ەلوردانىڭ كوممۋنالدى قىزمەتكەرلەرىمەن اڭگىمەلەسىپ، كومەك قولىن سوزدى.

قار تازالاپ توڭعان قىزمەتكەرلەر، ىستىق شاي ءىشىپ جىلىنىپ قالعاندارىن ايتىپ، العىستارىن ءبىلدىردى.