استانا-شاردجا باعىتىندا ۇشىپ كەتۋى ءتيىس بولعان Air Arabia اۋە كومپانياسىنىڭ رەيسى تاعى كەيىنگە قالدى دەپ حابارلايدى Qamshy.kz اقپارات اگەنتتىگى tengrinews.kz سايتىنا سىلتەمە جاساي وتىرىپ. بۇل جونىندە "نۇرسۇلتان نازاربايەۆ" اۋەجايىنىڭ باسپا ءسوز قىزمەتىندەگىلەر حابارلادى. 89 جولاۋشىسى بار ۇشاق استانادان 6 قاڭتار كۇنى ساعات 4.55-تە ۇشىپ شىعۋى ءتيىس بولعان. الايدا ەسىگى قاتىپ قالىپ، رەيس كەشكى ساعات 19.00-گە اۋىستىرىلعان بولاتىن. الايدا كورسەتىلگەن ۋاقىتتا ۇشاق تاعى ۇشىپ شىقپادى.

"جولاۋشىلار ءقاۋىپسىز جەردە، 1 نومەرلى تەرمينالدا. Air Arabia بۇل اۋە كەمەسىنە قىزمەت كورسەتۋ بويىنشا Air Astana اۋە كومپانياسىنىڭ قىزمەتىن پايدالانادى. قازىرگى تاڭدا "ەير استانا" كومپانياسىنىڭ ينجەنەرلەرى  ۇشاقتىڭ ۇشپاي قالۋ سەبەپتەرىن انىقتاپ جاتىر. استانا اۋەجايىنىڭ بۇل جايتقا جانە Air Arabia بورتىنىڭ تەحنيكالىق جاعدايىنا ەش قاتىسى جوق. استانا اۋەجايىنىڭ قىزمەتكەرلەرى جولاۋشىلاردى تىنىشتاندىرىپ، اۋەجاي عيماراتىندا ولارعا قولايلى بولۋ ءۇشىن جاعداي جاساپ، بار كۇشتەرىن سالىپ جاتىر"، - دەدى باسپا ءسوز قىزمەتىندەگىلەر.

كەيىن اۋەجاي ماماندارى استانا - شاردجا رەيسىنىڭ بەلگىسىز ۋاقىتقا قالدىرىلعانىن حابارلاپ، ادامداردىڭ ۇيگە جىبەرىلگەنىن ايتتى.

6 قاڭتار كۇنى كەشكە Facebook قولدانۋشىسى دەنيس كريۆوشەيەۆ الەۋمەتتىك جەلىدەگى پاراقشاسىنا Air Arabia ۇشاعىنىڭ قوزعالتقىشى "قاتتى تۇتىندەپ، وت المادى" دەپ جازدى. ول وقيعا ورنىنان بىرنەشە سۋرەت پەن ۆيدەونى جاريالادى، سونىمەن قاتار، "252 رەيسىنىڭ جولاۋشىلارى ۇشۋدان تۇبەگەيلى باس تارتتى" دەپ مالىمدەدى.

الايدا، استانا اۋەجايى باسپا ءسوز قىزمەتىنىڭ ماماندارى اۋە كومپانياسىنا جولاۋشىلاردىڭ ۇشۋدان باس تارتقاندارى جونىندە ەشكىمنىڭ حابارلاماعانىن ايتتى.