پارا الىپ ۇستالدى دەگەن ايىپ تاعىلعان ەرلان ءبىلالدىڭ ىسىنە قاتىستى جازۋشىلار وداعىنىڭ ءتوراعاسى نۇرلان ورازالين پىكىرىن ءبىلدىردى، دەپ حابارلايدى Qamshy.kz اقپارات اگەنتتىگى.  "ەرلان بىرەۋگە سەنىپ، قۇربان بولىپ وتىر" دەپ اتاپ ءوتتى ءتوراعا.

جازۋشىلار وداعىنىڭ ءتوراعاسى، قوعام قايراتكەرى، قالامگەر بۇل جايىندا بۇگىن الماتى قالاسىندا وتكەن باسپا ءسوز كونفەرەنسياسىندا ايتتى.

 "وسى تەاترىمىزدىڭ باس يەسى رەتىندە، كەشەگى الىپتارىمىزدى كورگەن، ارىستارىمىزدىڭ الدىنان ءدارىس العان ۇلتتىڭ ۇلى ورداسىن XXI عاسىرداعى جاڭا بۋىنعا، جاڭا ۇرپاققا امان-ەسەن تاپسىرساق دەپ جۇمىس ىستەپ جۇرگەن اقساقالىمىز اسەكەڭ تەلەارنادان ءجون ءسوزىن ايتتى. ءبىز ەرلاندى بىلەتىن ادامبىز، مەن ونى ەڭ العاشقى رولىنەن باستاپ، تەاتر ونەرىنە قالاي كەلگەنىن بىلەمىن، اللادان بىتكەن عاجاپ تالانتىنا قۋانىپ جۇرەتىن اعالارىنىڭ ءبىرى ەدىم. ەرلان كوز الدىمىزدا ءوستى. ەرلان بىرەۋدىڭ الا ءجىبىن اتتادى دەگەندى اتىراۋ مەن التايدىڭ اراسىندا جاتقان 70 تەاتر قاۋىمى سەنبەيدى. ەرلان تازا قالپى، ءوزىنىڭ اقكوڭىل بولمىسىمەن، سەنگىشتىگىمەن قۇربان بولىپ وتىرعان سەكىلدى. تالانت تاڭىردەن دەيدى، تالانت ۇلتتىڭ، حالىقتىڭ قازىنا بايلىعى. ونەردە قۇبىلىس بولىپ باعالانعان، جۇيىرىك اكتەرىمىزدىڭ ءبىزدى قيىندىققا دۋشار ەتىپ وتىرعانى جانىمىزعا باتادى. زاڭنىڭ الدىندا ءبارىمىز بىردەيمىز. ءبىراق زاڭ بار ەكەن دەپ دەمالىستا جۇرگەن تەاتردى قولمەن سەناريي جاساپ وسىنداي جاعدايعا دۋشار ەتۋ كىسىلىكتىڭ تۇرعىسىنان دا، ءومىر تىرشىلىكتىڭ تۇرعىسىنان دا كوڭىلگە قونا قوياتىن نارسە ەمەس. "، - دەيدى ول.

ەسكە سالا كەتەر بولساق، م.اۋەزوۆ اتىنداعى دراما تەاترىنىڭ ديرەكتورى ەرلان ءبىلال 1،5 ميلليون تەڭگە كولەمىندە پارا الدى دەگەن ايىپپەن ۇستالعان بولاتىن.