قازاقستان پارلامەنتى ءماجىلىسىنىڭ دەپۋتاتى باقىتبەك سماعۇل 9 قاڭتار كۇنى اقتوبەدەگى №56 مەكتەپتە بالالارى ساباققا ورامالمەن كەلىپ جۇرگەن اتا-انالارمەن كەزدەستى. بۇل تۋرالى Qamshy.kz اقپارات اگەنتتىگى ازاتتىق راديوسىنا سىلتەمە بەرىپ. اقتوبە وبلىستىق ءبىلىم باسقارماسى ۇيىمداستىرعان بۇل كەزدەسۋگە مۇعالىمدەر مەن اتا-انالار، بارلىعى 200-دەن استام ادام كەلگەن.

كەزدەسۋدە ءسوز سويلەگەن قالا تۇرعىنى سۆەتلانا دوسماعامبەتوۆانىڭ ايتۋىنشا، 9 سىنىپتا وقيتىن قىزى ورامالى ءۇشىن دۇيسەنبىدەن بەرى مەكتەپكە كىرە الماي ءجۇر.

ءوزىن «داۋلەتكەرەي نازەنوۆپىن» دەپ تانىستىرعان قالا تۇرعىنى مىنبەرگە شىعىپ، قازاقستاننىڭ ءبىلىم مينيسترلىگى، پارلامەنت دەپۋتاتتارى مەن ءدىن ىستەرى جونىندەگى اگەنتتىك ءتوراعاسىنا ارنالعان ۇندەۋىن وقىپ بەردى. ۇندەۋ سوڭىندا «ءبىز مۇنداي قىسىمنان شارشاپ كەتتىك، ءوز وتانىمىزدا ءوزىمىزدى بوتەن سەزىنىپ ءجۇرمىز. ورامال داۋىن شەشۋدىڭ جولدارى كوپ. سونىڭ ءبىرى - ءدىن ۇستاناتىن وقۋشى قىزدار ءۇشىن ارنايى مەكتەپ-مەدرەسە سالۋ. ەگەر مەدرەسە بيۋدجەت ءۇشىن قىمباتقا تۇسەتىن بولسا، بۇل ماسەلەنى وڭتايلى شەشۋدىڭ باسقا دا جولدارىن قاراستىرساڭىزدار؟» دەدى ول.

پارلامەنت ءماجىلىسىنىڭ دەپۋتاتى باقىتبەك سماعۇل اشۋ قىسىپ، تۇس-تۇستان شۋلاپ كەتكەن اتا-انالاردى سابىرعا شاقىرۋعا تىرىستى. مەكتەپ مۇعالىمدەرىنىڭ قازاقستاننىڭ ءبىلىم جانە عىلىم مينيسترلىگىنىڭ 2016 جىلى قاڭتاردىڭ 14ء-ى كۇنى شىققان بۇيرىعىن نەگىزگە الىپ وتىرعاندىعىن ايتتى. ال اقتوبە وبلىستىق ءبىلىم باسقارماسىنىڭ باسشىسى ءلاززات ورازبايەۆا «مەكتەپ فورماسى ساقتالۋى كەرەك. فورمانىڭ ساقتالماۋىنان وقۋشى ساباقتان قالاتىن بولسا، ەڭ الدىمەن اتا-انا جاۋاپ بەرەدى» دەپ ەسكەرتتى.

ەكى جارىم ساعاتقا سوزىلعان جيىندا تاراپتار ءبىر مامىلەگە كەلە المادى. پارلامەنت ءماجىلىسىنىڭ دەپۋتاتى باقىتبەك سماعۇل اقتوبەلىكتەر كوتەرگەن ماسەلەنى استاناعا جەتكىزۋگە ۋادە ەتتى.