وسكەمەندە تانىمال بلوگەر رينات حاليكوۆتىڭ ءىسى سوتتا جەدەلدەتىلگەن رەجىمدە قارالىپ، ۇكىم شىعارىلدى، دەپ حابارلايدى Qamshy.kz اقپارات اگەنتتىگى altaynews.kz سايتىنا سىلتەمە جاساپ.

تەرگەۋ ماتەريالدارىنا سايكەس، رينات حاليكوۆ ەكس-دەپۋتات جانە كاسىپكەر ەرجان سقاقوۆتان 30 مىڭ دوللار مەن ءۇش بولمەلى پاتەر بوپسالاعان. ولاردى بەرمەگەن جاعدايدا سقاقوۆتىڭ بەدەلىنە نۇقسان كەلتىرەتىن مالىمەت جاريالايتىنىن ايتقان.

ەسكە سالساق، 19 جاستاعى ەلەنا يۆانوۆا ەكس-دەپۋتاتتى ءوزىن زورلادى دەپ ايىپتاعان بولاتىن. قىلمىستىق ءىس قوزعالىپ، كەيىن ول جابىلدى. بويجەتكەن ءىستى قايتا قاراۋدى سۇراپ، ق ر پرەزيدەنتىنە حات جازعان ەدى. سوعان قاراعاندا، بلوگەر وسى جاعدايدى ءوز پايداسىنا اسىرماق بولعان. ول 2017 جىلدىڭ قازان ايىندا سقاقوۆتان اقشا الۋ بارىسىندا ۇستالدى.

«سوتتالۋشى ق ر قك-نىڭ 194-بابى 4-بولىمىنە سايكەس كىنالى دەپ تانىلىپ، وعان قىلمىستىق جولمەن الىنعان مۇلىكتى تاركىلەۋمەن 7 جىلعا باس بوستاندىعىنان ايىرۋ جازاسى تاعايىندالدى. حاليكوۆتان جابىرلەنۋشىنىڭ پايداسىنا 1 ميلليون 20 مىڭ تەڭگە كولەمىندەگى ماتەريالدىق شىعىن ءوندىرىپ الىنسىن. 30 مىڭ دوللار كولەمىندەگى اقشالاي قاراجات سوت ۇكىمى كۇشىنە ەنگەننەن كەيىن سقاقوۆقا قايتارىلسىن»،- دەلىنگەن شقو قىلمىستىق ىستەر جونىندەگى مامانداندىرىلعان اۋدانارالىق سوتىنىڭ ۇكىمىندە. حاليكوۆ جازاسىن قاتاڭ رەجىمدەگى تۇرمەدە وتەيتىن بولادى.