1997 جىلدىڭ قىتىمىر قىسىندا، قاڭتاردىڭ قاقاعان ايازىندا كوكشەتاۋ قالاسىندا جىلۋ قازانى جارىلىپ، سۋ قاتىپ، ادامدار بۇرسەڭ قاعىپ قالعان ەدى. سول سۇمدىق بۇل قالانىڭ تاريحىنا وشپەس وكىنىشتەي بولىپ جازىلدى. سودان بەرى 20 جىل وتسە دە كوكشەتاۋلىقتار  قىلىشىن سۇيرەتىپ قىس كەلگەندە سۋىق قاتتى بولسا تاعى دا قازاندىعىمىز جارىلىپ، جىلۋسىز قالماس پا ەكەنبىز دەگەن عارىپتىكتەن ارىلا الماي كەلەدى.

ويتكەنى، كوكشەتاۋ جىلۋ ەلەكتر ورتالىعى (جەو) جوق جالعىز وبلىس ورتالىعى، مۇندا جىلۋدى جەرگىلىكتى قازاندىق بەرەدى. ءقازىر سول قازاندىقتىڭ قۋاتى تاۋسىلىپ، بارلىق رەسۋرستارى ءبىتىپ، اۋىستىرۋدى قاجەت ەتىپ وتىر. مۇندا 20 جىل بويى اۋىسقان بىردە-بىر اكىمنىڭ قارىمى جەو سالۋعا جەتپەدى. تەك ءبىر-اق جىل اكىم بولعان قايرات قوجامجاروۆ قانا بۇل ءىستى قولعا العان ەدى. ونى ءتىپتى پرەزيدەنت ن.نازاربايەۆ تا قولداعان. ءبىراق ودان كەيىن اكىم بولعاندار بۇل ءىستى جالعاستىرا الماي، ەنەرگەتيكا مينيسترلىگىنىڭ ۆەدومستۆولىق مۇددەسىنەن شىعا الماي، جوبانى جاپتى.

الايدا كوكشەتاۋدا جەو سالۋ جوباسىن ىسكە اسىرۋعا اتسالىسامىز دەپ جۇڭگو مەن رەسەي تۇگىل گەرمانيا، ۇلىبريتانيا، يزرايل سياقتى ەلدەردەن دەلەگاسيالار كەلگەن. اسىرەسە، ەلىمىزدە كوپتەگەن جوبالاردى، سونىڭ ىشىندە اقتاۋداعى بيتۋم زاۋىتىن، 1 مىڭ شاقىرىمعا جۋىق اۆتوجولدار سالۋدى ىسكە اسىرعان قىتايدىڭ «CITIC CONSTRUCTION Co. Ltd»  دەگەن كومپانياسى ۇسىنىپ وتىرعان جوبانىڭ قاراجاتى دا، تەحنيكالىق قۋاتى دا، ەكولوگيالىق تازالىعى دا دىتتەگەن جەردەن شىعىپ تۇر. تەك سونى قولداپ، ىسكە كىرىسۋ كەرەك. ونى ىسكە اسىراتىن قاراجات كوزدەرىن دە تابۋعا بولادى.

ءتىپتى، قحر ءتوراعاسى سي ءسزينپيننىڭ وتكەن جىلى استاناعا كەلگەن ساپارى اياسىندا قول قويىلعان ەكونوميكالىق ىنتىماقتاستىق كەلىسىمشارتتارى اراسىندا وسى جوبا دا بولعان. ەندى سول شارۋانى ىسكە اسىرۋ تەك قازاقستان ۇكىمەتتىڭ الدىندا تۇر. ءماجىلىس دەپۋتاتى ايقىن قوڭىروۆ وسى ماسەلەنىڭ ءبارىن ەگجەي-تەگجەيلى ايتىپ، ۇكىمەت باسشىسى باقىتجان ساعىنتايەۆتىڭ اتىنا دەپۋتاتتىق ساۋال جولداپ، جوبانى ىسكە اسىرۋدى ۇسىندى. ەندىگى ءسوز ۇكىمەت باسشىسىندا. كوكشەتاۋدى عارىپتىكتەن قۇتقارۋ سول كىسىنىڭ قولىندا.

س.ەلەۋ، ساراپشى