ءار ەلدىڭ زاڭى ءار ءتۇرلى بولىپ كەلەدى. كوپتەگەن مەملەكەتتەردە اۋىر قىلمىس ىستەگەن ادامدى جازالايتىن بولسا، كەيبىر ەلدەردە قىلمىستى ىستەگەن ادامدى ەمەس، قۇربان بولعان ادامدى جازاعا تارتادى ەكەن. سول سەكىلدى anews.com سايتىنا جاريالانعان وقيعالاردىڭ ءبىرىن Qamshy.kz اقپارات اگەنتتىگى نازارلارىڭىزعا ۇسىنادى.

دەرەكتەرگە سەنسەك، پاكىستاندا 19 جاستاعى قىز ءولىم جازاسىنا كەسىلىپتى. جاس بويجەتكەن ءوزىن اعاسى زورلىققا جىقتى دەپ جەرگىلىكتى سوتقا شاعىم تۇسىرگەن، الايدا سوت قىلمىسكەردى ەمەس قۇربان بولعان قىزعا ۇكىم شىعارعان. سونىمەن قاتار، قىلمىسكەر بويجەتكەندى تاپانشامەن قورقىتقان ەكەن.

بۇل وقيعا جايىندا 19 جاستاعى قىز رادجانپۋردەگى سوتقا شاعىم تۇسىرگەن. بۇل تايپالىق جۇيە سوت تورەلىگىنىڭ نورمالارى مەن رەسمي سوت شەشىمىنەن بولەك جۇمىس ىستەيدى. بەلگىلى بولعانداي، مۇنداي تايپالىق سوت جۇيەسى بەلگىلى ءبىر قالالاردا بار. الايدا سوت قىزدىڭ ءوزىن ايىپتاپ، قىلمىسكەردى ەمەس قۇربان بولعان ادامدى جازاعا تارتۋ تۋرالى ۇكىم شىعارىپ.

ەڭ تاڭقالارلىعى – مۇنداي سوتتىڭ قۇرامىندا قۇربان بولعان قىز بەن زورلىق جاساعان قىلمىسكەردىڭ اكەسى دە بولادى. ول ءوزىنىڭ قىزىن زيناقورلىق جاسادى دەپ ايىپتاپ، نەكە ادالدىعىن بۇزۋشى «كاريي» دەپ اتاعان.

ناتيجەسىندە، قىزدى كۇڭ رەتىندە ساتۋعا نەمەسە ولگەنشە تاسپەن اتىپ جازالاۋعا ۇكىم شىعارىلدى. ال زورلىق كورسەتكەن قىلمىسكەرگە قاتىستى سوت ەشقانداي دا شارا قولدانباعان.

زورلىققا ۇشىراعان قىز وزىنە شىعارىلعان ۇكىممەن كەلىسپەي، قۇزىرلى ورگاندار مەن پوليسياعا حابار بەرگەن. ولار دەرەۋ قىلمىستىق ىسكە قاتىستى تەرگەۋ جۇمىستارىن باستاپ، پانچايات دەپ اتالاتىن تايپالىق سوت وكىلدەرىنىڭ بارلىعى قاماۋعا الىنىپ، 19 جاستاعى قىزدى مەملەكەت ءوز قامقورلىعىنا العان.

بۇل ەلدە ايەلدەردى كوبىندە زيناقورلىقپەن ايىپتاپ، ءوز وتباسىلارىنىڭ مۇشەلەرى ولتىرەدى. ولار مۇنى وزدەرىنىڭ بەدەلىن ساقتاپ قالۋ ءۇشىن، ۇياتتى قانمەن جۋۋ كەرەك دەپ اتايدى.