بۇگىن بقو-نىڭ اقساي قالاسىندا بەرەزوۆ جانە بەستاۋ اۋىلدارىنان كوشىپ كەلگەن تۇرعىندارعا ارناپ سالىنعان ارالتال شاعىن اۋدانىندا اقساي قالالىق №8 جالپى ورتا ءبىلىم بەرەتىن مەكتەبى اشىلدى، دەپ جازادى Qamshy.kz اقپارات اگەنتتىگى.

مەكتەپ عيماراتى تولىقتاي زاماناۋي ۇلگىدە سالىنىپ، قاجەتتى كەرەك-جاراقتارمەن قامتاماسىز ەتىلگەن. 300 بالاعا ارنالعان ءبىلىم وشاعىندا سپورت زالدارى، اسحانا، زەرتحانا كابينەتتەرى مەن شەبەرحانا، سونداي-اق شاعىن ورتالىق جۇمىسىنا ارنالعان ارنايى ورىندار قاراستىرىلعان. 

وقۋ ورداسىنىڭ اشىلۋ سالتاناتىنا باتىس قازاقستان وبلىسى اكىمىنىڭ ورىنباسارى ع. وسپانقۇلوۆ قاتىسىپ، بارلىق اتا-انالار مەن مۇعالىمدەردى، ەڭ باستىسى – وقۋشىلاردى ايتۋلى وقيعامەن قۇتتىقتادى.

ول ءوز سوزىندە ەلباسى بيىلعى جولداۋىنىڭ «ادامي كاپيتال – جاڭعىرۋ نەگىزى» اتتى جەتىنشى باعىتىندا ەلىمىزدەگى ءبىلىم بەرۋ سالاسىنا ەرەكشە كوڭىل ءبولىپ، بۇل ىستە وزىق جۇيەنى قالىپتاستىرۋ كەرەكتىگىن ايتقانىنا توقتالدى. سونداي-اق «رۋحاني جاڭعىرۋ» باعدارلاماسىندا دا مەملەكەتتىڭ العا دامۋى تەك ءبىلىمنىڭ سالتانات قۇرۋى ارقىلى عانا مۇمكىن دەپ ايتىلعانىنا ەرەكشە نازار اۋداردى.

بۇل ورايدا وبلىس كولەمىندە اتقارىلعان اۋقىمدى ىستەر تۋرالى ايتىپ، جىل سايىن ءبىلىم ساپاسىن ارتتىرۋ، مۇعالىمدەردىڭ بىلىكتىلىگىن ارتتىرۋ، جاڭا ءبىلىم بەرۋ نىساندارىنىڭ قۇرىلىسىن جۇرگىزىلىپ جاتقانىن جەتكىزدى.

سونىڭ ىشىندە وتكەن جىلى وبلىس بويىنشا 24 ءبىلىم بەرۋ نىسانى سالىنسا، بيىل تەك قاڭتار ايىنىڭ وزىندە 2 بىردەي جاڭا مەكتەپ پايدالانۋعا بەرىلىپ وتىرعاندىعىن تىلگە تيەك ەتتى. ولاردىڭ بىرەۋى كۇنى كەشە ورال قالاسىنىڭ دەركول شاعىن اۋدانىندا بەرىلگەن 600 ورىندىق مەكتەپ بولسا  بولسا، ەكىنشىسى - 300 بالاعا ارنالعان ارالتال مەكتەبى.

ەستەرىڭىزگە سالساق، قازىرگى ۋاقىتتا ءبورلى اۋدانىنا قاراستى بەرەزوۆ جانە بەستاۋ اۋىلدارى تولىق كوشىرىلىپ، تۇرعىندار جاڭا تۇرعىن ۇيمەن جانە قارجىلاي كومەكپەن قامتىلدى. بالالار ءۇشىن ارنايى جاڭا بالاباقشا مەن مەكتەپ سالىندى.