ورتەنگەن اۆتوبۋستىڭ ءۇش جۇرگىزۋشىسى تەرگەۋ يزولياتورىنا قامالدى. بۇل تۋرالى اقتوبە وبلىستىق پروكۋراتۋراسىنىڭ اپپارات جەتەكشىسى جاسۇلان داۋلەمبايەۆ ءوزىنىڭ Facebook پاراقشاسىندا حابارلادى، دەپ جازادىQamshy.kz اقپارات اگەنتتىگى.

جۇرگىزۋشىلەردە قازاقستان قىلمىستىق كودەكسىنىڭ 345-بابى (كولiك قۇرالدارىن باسقاراتىن ادامداردىڭ جول ءجۇرىسى نەمەسە كولiك قۇرالدارىن پايدالانۋ قاعيدالارىن بۇزۋى) 4-تارماعى بويىنشا ايىپ تاعىلعان. بۇل تارماق بويىنشا بەس جىلدان ون جىلعا دەيىن باس بوستاندىعىنان ايىرۋ جازاسى قاراستىرىلعان.

جاسۇلان داۋلەمبايەۆتىڭ مالىمەتىنشە، اۆتوبۋستاعى ورتتەن امان قالعان ءۇش قازاقستاندىق 24 قاڭتار كۇنى كەشكى وندا اقتوبەدەگى تەرگەۋ يزولياتورىنا قامالعان. كۇدىكتىلەردى ىشكى ىستەر مينيسترلىگى تەرگەۋ دەپارتامەنتىنىڭ جەدەل-تەرگەۋ توبى تەرگەپ جاتىر. الدىن-الا تەرگەۋ كەزىندە اۆتوبۋس جۇرگىزۋشىلەرىنىڭ سالوندى دانەكەرلەۋشى لامپامەن جىلىتىپ، اۆتوكولىكتى پايدالانۋ ەرەجەسى مەن ءورت قاۋىپسىزدىگى ەرەجەسىن بۇزعانى انىقتالعان.

تەرگەۋ اۆتوبۋستىڭ ورتەنىپ كەتۋىنە ءۇش جۇرگىزۋشىنى دە ايىپتايدى. بۇل قىلمىستىق ءىستىڭ تەرگەلۋ بارىسىن باقىلاۋ پروسەسسۋالدىق پروكۋرورلار توبىنىڭ 1-قىزمەتىنە، اقتوبە جانە وڭتۇستىك قازاقستان وبلىستىق پروكۋراتۋراسىنا جۇكتەلگەن.

جاسۇلان داۋلەمبايەۆ ءىستى قازاقستاننىڭ باس پروكۋراتۋراسى مەن ىشكى ىستەر مينيسترلىگى دە باقىلاپ وتىرعانىن حابارلادى.

ايتا كەتەيىك، اقتوبەدە اۆتوبۋس ورتەنىپ، 52 ادامنىڭ قازا تاپقانى جايلى حابارلانعان بولاتىن. Ikarus ماركالى اۆتوبۋستىڭ 18 قاڭتاردا ساعات 10:30-دا اقتوبە وبلىسى ىرعىز اۋدانىندا سامارا - شىمكەنت تاسجولىنىڭ 1068 شاقىرىمىندا، قالىباي اۋىلىنان 10 شاقىرىم جەردە ورتەنگەنى ايتىلعان ەدى. اۆتوبۋستىڭ ىشىندە 55 جولاۋشى جانە ەكى جۇرگىزۋشى بولعان. ونىڭ بەسەۋى اۆتوبۋستان شىعىپ ۇلگەرگەن.