ورتالىق ازيا مەملەكەتتەرىنىڭ باسشىلارى العاش رەت رەسمي سامميتە باس قوسادى. بۇل ۋاقىتقا دەيىن 5 ەلدىڭ باسشىلارى بەيرەسمي تۇردە، ەكى جاقتى، ءۇش جاقتى نەمەسە تمد، شىۇ، ەۋرازەق شەڭبەرىندە كەزدەسۋلەر وتكىزگەن، دەپ جازادى Qamshy.kz اقپارات اگەنتتىگى News.tj سايتىنىڭ مالىمەتىنە سۇيەنە وتىرىپ.
قازاقستان جانە وزبەكستان پرەزيدەنتتەرىنىڭ باستاماسىمەن ورتالىق ازيا مەملەكەتتەرىنىڭ باسشىلارى ناۋرىز مەيرامى قارساڭىندا استانا قالاسىندا العاشقى ءسامميتىن وتكىزبەك.
دەرەكتەردە كورسەتىلگەندەي، الداعى ۋاقىتتا وتەتىن بۇل سامميت ورتالىق ازيا ەلدەرى اراسىنداعى قارىم-+قاتىناستىڭ جاڭا دەڭگەيگە كوتەرىلۋىنە ۇلكەن سەپتىگىن تيگىزبەك جانە دە ايماقتاعى بارلىق ەلدەردىڭ مۇددەلەرىن قاناعاتتاندىراتىن جاڭا باعدارلامالار مەن جوبالاردىڭ ىسكە اسىرىلۋىنا تۇرتكى بولادى.
«ءبىزدىڭ ەلىمىز تاۋەلسىزدىككە قول جەتكىزگەننەن بەرى بارلىق ەلدەرمەن قارىم-قاتىناسىن جاقسارتىپ، ايماقتاعى بارلىق ەلدەردىڭ تىعىز ينتەگراسياسىن قولداپ كەلەدى. جانە دە ەشقاشان دا مۇنداي سامميتتەردى ەلەۋسىز قالدىرمايدى»، - دەپ مالىمدەدى تاجىكستان ۇكىمەتى.
بەلگىلى بولعانداي، ءسامميتتىڭ ناقتى داتاسى ءالى كەلىسۋ ساتىسىندا تۇر.
«ورتالىق ازيا مەملەكەتتەرىنىڭ الدىندا تۇرعان ورتاق ماقسات – حالىقتىڭ ەركىن قوعالىسى، كاپيتالدىڭ كەدەرگىسىز قوزعالىسى جانە ينۆەستيسيا مەن ەڭبەك ءۇشىن وڭىردە قولايلى كليمات قۇرۋ قاجەتتىلىگىن تالاپ ەتەدى.
وس قاعيدانى ەسكەرە وتىرىپ، قازىرگى زامانعى جاھاندىق قاۋىپ-قاتەرلەرگە قارسى تۇرۋ ءۇشىن ءبىز قاۋىپسىزدىك سالاسىنداعى ىنتىماقتاستىعىمىزدى دا ارتتىرا الامىز.
ءبىزدىڭ ويىمىزشا، شىعارماشىلىق ايماقتىق ىقپالداستىق ورتالىق ازيانىڭ بارلىق مەملەكەتتەرى مەن حالىقتارىنىڭ مۇددەلەرىن بەينەلەيدى»، - دەپ مالىمدەدى ەمومالي راحمون.
حالىقارالىق ىستەر بويىنشا كەڭەس ءتوراعاسى، ساياساتكەر ەرلان ءقاريننىڭ ايتۋىنشا، ورتالىق ازيا ەلدەرىنىڭ باسشىلارى سوڭعى 10 جىلدا العاش رەت باس قوسايىن دەپ وتىر جانە دە 2018 جىل ورتالىق ازيا مەملەكەتتەرى ءۇشىن وڭىرلىك ىنتىماقتاستىق سالاسىنداعى ماڭىزدى كەزەڭ بولىپ تابىلادى.
«اعىمداعى جىلدا ورتالىق ازيا ەلدەرى اراسىنداعى قارىم-قاتىناس بارلىق سالادا دامي تۇسەدى. ەلدەر اراسىنداعى قارىم-قاتىناس بۇل تۇرعىدا قوزعاۋشى كۇشكە اينالادى»، - دەيدى ول.
«2017 جىلى ورتالىق ازيا باسشىلارى ەكى جاقتى كەزدەسۋلەردى وتە كوپ وتكىزدى. بۇل جىلى مۇنداي كەزدەسۋلەر بارلىق ايماقتى قامتىپ، كوپ جاقتى فورماتتا ءوتۋى ابدەن مۇمكىن. 2018 جىلى ەلدەر اراسىنداعى قارىم-قاتىناس جاڭاشا فورماتتا داميتىن بولادى»، - دەپ قوسا ايتىپ ءوتتى ەرلان قارين.
الەمدىك بانك بولجامىنا سايكەس، 2018 جىلى ايماقتاعى ەكونوميكالىق ءوسىم 2،7%-عا جەتۋى مۇمكىن.
قازىرگى ۋاقىتتا ورتالىق ازيا باسشىلارىنىڭ جاڭا كەزدەسۋلەرى مەن رەسمي ساپارلارى جوسپارلانۋدا.
وزبەكستان پرەزيدەنتى شاۆكات ميرزيەيەۆ كوكتەمنىڭ باسىندا تاجىكستان ەلىنە رەسمي ساپارمەن بارۋعا دايىندالىپ جاتقاندىعىن ايتتى.
«جاقىندا ءبىز ءبىرقاتار كەلىسىمدەرگە قول قويامىز، ورتالىق ازياداعى ءبىرىڭعاي ەنەرگەتيكالىق جۇيەنى قالىپقا كەلتىرەمىز، تەمىرجولدى ىسكە قوسىپ، باسقا دا ماسەلەلەردى تالقىلايتىن بولامىز»، - دەپ مالىمدەدى شاۆكات ميرزيەيەۆ.
