بۇگىن «استانا ەكسپو-2017» ۇك» اق باسقارما ءتوراعاسى ەربول شورمانوۆ جاپونيانىڭ قازاقستان رەسپۋبليكاسىنداعى توتەنشە جانە وكىلەتتى ەلشىسى يتيرو كاۆاباتامەن كەزدەسۋ وتكىزدى، دەپ Qamshy.kz اقپارات اگەنتتىگى  «استانا ەكسپو-2017» ۇك» اق قوعاممەن بايلانىس دەپارتامەنتىنە سىلتەمە جاساپ حابارلايدى.

باسقارما ءتوراعاسى مارتەبەلى مەيمانعا كورمە اياقتالعان سوڭ، ۇلتتىق كومپانياعا مىندەتتەلگەن ءبىرقاتار جۇمىستار جونىندە ايتىپ بەردى. سونداي-اق، ە.شورمانوۆ 2017 جىلعى قاراشانىڭ 10-نان باستاپ «نۇر الەم» ۇلتتىق پاۆيلونى، ۇزدىك تاجىربيەلەر ايماعى، ەنەرگيا حولى جانە كونگرەسس ورتالىعىنىڭ كەلۋشىلەر ءۇشىن قايتا ىسكە قوسىلعانىنا دا توقتالدى. كەزدەسۋ بارىسىندا «استانا» حالىقارالىق قارجى ورتالىعى، «Astana Hub» ءىت-ستارتاپتارىنىڭ حالىقارالىق تەحنوپاركى، جاسىل تەحنولوگيالار ورتالىعى جانە وزگە دە ۇيىمدار جايعاساتىن نىسانداردا قايتا جوندەۋ جۇمىستارى جۇرگىزىلىپ جاتقانى باياندالدى.

ەربول شورمانوۆ جاپونيانىڭ «استانا ەكسپو-2017» كورمەسىنە قاتىسقانى ءۇشىن يتيرو كاۆاباتاعا العىسىن ءبىلدىردى.

«جاپونيا كورمەگە قاتىساتىنىن العاشقى بولىپ راستاعان مەملەكەتتەردىڭ قاتارىندا. كورمە كەزىندە كۇنشىعىس ەلىنىڭ پاۆيلونى ەڭ كوپ تاماشالانعان «ۇزدىك 10» پاۆيلون (700 مىڭ ادام تاماشالاعان) قاتارىنان ورىن الدى. ەكسپو-2017 بارىسىندا، كورمەگە كەلۋشىلەر جاپون حالقىنىڭ مادەنيەتىمەن جانە داستۇرىمەن ەتەنە تانىسىپ،  جارىقديودى، بالدىر بيوماسساسى جانە سۋتەكتى ەنەرگەتيكا سالاسىنداعى سوڭعى تەحنولوگيالارىن تاماشالادى.  ەڭ باستىسى، ەكى ەلدىڭ بيزنەس وكىلدەرى ءوزارا بايلانىس ورناتتى»، – دەدى ە.شورمانوۆ.

        ءوز كەزەگىندە جاپونيا ەلشىسى ەكسپو-2017 كورمەسىنىڭ ۇيىمداستىرىلۋ دەڭگەيىنە جوعارى باعا بەردى.

«ەكسپو-2017 حالىقارالىق مامانداندىرىلعان كورمەسىنىڭ وتكىزىلۋى ەكى ەل اراسىنداعى دوستىق قارىم-قاتىناستىڭ نىعايۋىنا سەپ بولعانىن ۇلكەن سەنىممەن ايتا الامىن»، - دەدى ي.كاۆاباتا.

سونداي-اق، ي.كاۆاباتا مىرزا  جاپونيانىڭ وساكو قالاسىندا ەكسپو-2025 بۇكىلالەمدىك كورمەسىن وتكىزۋ قۇقىعىنا يە بولۋى باعىتىنداعى جۇمىستاردى ىلگەرىلەتۋدە  ەكەنىن تىلگە تيەك ەتتى.

كەزدەسۋ سوڭىندا ەربول شورمانوۆ يتيرو كاۆاباتا مىرزاعا بولگەن ۋاقىتى ءۇشىن العىس ايتىپ، جاپونيا تاراپىنىڭ جوعارى تەحنولوگيالار مەن جاسىل ەنەرگەتيكا سالاسىندا الداعى ۋاقىتتا دا بىرلەسىپ جۇمىس اتقاراتىنىنا سەنىم ءبىلدىردى.