"مۇناي جانە ەنەرگەتيكا سالاسىنىڭ حالىقارالىق دارەجەدەگى ماماندارى قازاقستاندا دايىندالۋى كەرەك"، - دەپ مالىمدەدى تيمۋر قۇلىبايەۆ.

الەمدىك ەنەرگەتيكا كورپوراسيالارى وتاندىق جوعارى وقۋ ورىنداردىڭ بازاسىندا مامان دايىنداۋعا جاعداي جاساۋدا

26 قاڭتاردا الماتىدا KAZENERGY قاۋىمداستىعى كەڭەسىنىڭ 22-كوشپەلى وتىرىسى ءوتتى. جيىنعا «اتامەكەن» ق ر ۇكپ ءتورالقا ءتوراعاسى تيمۋر قۇلىبايەۆ قاتىستى، دەپ حابارلايدى Qamshy.kz اقپارات اگەنتتىگى.

كەڭەس وتىرىسىن اشقان تيمۋر قۇلىبايەۆ KAZENERGY قاۋىمداستىعى اتقارعان جۇمىسقا وڭ باعا بەردى. سونىمەن قاتار، ۇلتتىق كاسىپكەرلەر پالاتاسىنىڭ باسشىسى 2017 جىلى جەر قويناۋىن پايدالانۋ مەن سالىق كودەكستەرىنىڭ قابىلداۋ دا ەرەكشە ماڭىزعا يە شارا ەكەنىن اتاپ ءوتتى.

«بارىڭىزگە بەلگىلى، قاۋىمداستىق مۇشەلەرى سالىق جانە جەر قويناۋى تۋرالى كودەكستەردىڭ دايىندالۋىنا بەلسەنە قاتىستى. ۇسىنىسىمىزدىڭ كوبى وسى قۇجاتتارعا ەندى. ءبىزدىڭ زاڭعا ەنگىزگەن وزگەرتۋلەرىمىز ينۆەستيسيالىق تارتىمدىلىقتى ارتتىرىپ، وسى ارقىلى ەلىمىزدەگى ينۆەستيسيالىق احۋالدىڭ جاقساراتىنىنا سەنەمىز. سونداي-اق ەنەرگەتيكا سەكتورىنىڭ جۇمىسشىلارىنا قازاقستاندا تابىستى جۇمىس ىستەۋ ءۇشىن جاعداي جاسالادى دەگەن ۇمىتتەمىز»، - دەدى «اتامەكەن» ۇكپ ءتورالقا ءتوراعاسى.

جيىن بارىسىندا تيمۋر قۇلىبايەۆ قاۋىمداستىق ادامي كاپيتالدى دامىتۋعا ەرەكشە كوڭىل ءبولىپ وتىرعانىن اتادى. ۇلتتىق پالاتا باسشىسى قازاق-بريتان تەحنيكالىق ۋنيۆەرسيتەتىندە وتاندىق ءىرى مۇناي-گاز كومپانيالارىنىڭ كومەگىمەن جابدىقتالعان زەرتحانالارمەن تانىستى.

«قاۋىمداستىق قۇرامىنداعى 83 كومپانيانىڭ مامان دايىنداۋداعى مىندەتتەمەسى بار. بۇگىنگى جيىن قازاق-بريتان تەحنيكالىق ۋنيۆەرسيتەتىندە وتكىزىلۋى تەگىن ەمەس. مۇناي-گاز جانە ەنەرگەتيكا سالالارىنا مامان دايىنداۋ قانداي دەڭگەيدە ەكەنىن كوزبەن كورە الامىز. زەرتحانالار جاقسى جابدىقتالعان. سونداي-اق بۇل ۋنيۆەرسيتەتتىڭ قاراماعىندا ەكى اكادەميالىق ينستيتۋت جۇمىس ىستەيدى. ءبىز وسى الەۋەتتى پايدالانۋىمىز كەرەك. قازىرگى تاڭدا ءبىلىم بەرۋدىڭ جاڭا باعىتتارى قولعا الىنىپ جاتىر، بىزگە قانداي ماماندار قاجەت ەكەنىن ايتۋىمىز كەرەك. تەك مۇناي وندىرۋدە ەمەس، كولىك، قايتا وڭدەۋ، حيميا سالالارىنا دا قاجەتتىنى ۇسىنۋ قاجەت. سالالاردىڭ الدىندا تۇرعان مىندەت، ءبىز مامانداردى قازاقستاندا دايىنداۋىمىز كەرەك. مىسالى «Chevron» كومپانياسى باستاپقىدا مامانداردى شەتەلدە دايىنداۋدى قالادى. الايدا وسى قازاق-بريتان تەحنيكالىق ۋنيۆەرسيتەتىنىڭ قابىرعاسىندا زەرتحانا اشتى. حالىقارالىق دارەجەدەگى ماماندار الماتىدا دايىندالادى»، – دەدى تيمۋر قۇلىبايەۆ.

كەڭەس وتىرىسىنا ق ر ەنەرگەتيكا ءمينيسترى قانات بوزىمبايەۆ قاتىستى. مينيستر ءجىو ارتۋىندا «قازاقستان – وتىن-ەنەرگەتيكالىق كەشەنى» لوكوموتيۆ بولعانىنا باسا نازار اۋداردى.

«2017 جىلى مۇناي-گاز جانە ەنەرگەتيكا سالاسىندا كورسەتكىش جاقسى. ءبىزدىڭ الدىمىزدا وسى قول جەتكىزگەن ترەندتەردى ساقتاۋ جانە دامىتۋ مىندەتى تۇر. مۇمكىن 10،5 %-عا ءوسۋ بولماس، دەگەنمەن وڭ ناتيجە بولادى دەپ بولجاپ وتىرمىز. قاۋىمداستىققا العىس بىلدىرگىم كەلەدى، بىلتىر ءبىزدىڭ سالاعا قاتىستى نەگىزگى قۇجاتتاردىڭ دايىندالۋىنا كۇش سالدىق. جەر قويناۋىن پايدالانۋ كودەكسى مەن سالىق كودەكسىنە تۇبەگەيلى وزگەرىستەر ەنگىزىلدى. قاۋىمداستىقتىڭ قولداۋى بولماسا، وسىنداي ساپالى قۇجات دايىندالماس ەدى. بيىل جەر قويناۋىن پايدالانۋ تۋرالى كودەكستى جۇزەگە اسىرۋدا 52 ءنورماتيۆتى قۇقىقتىق اكتى دايىنداۋىمىز قاجەت»، – دەپ حابارلادى مينيستر.

قاۋىمداستىق كەڭەسىنىڭ وتىرىسىندا KAZENERGY باس ديرەكتورى اسەت ماعاۋوۆ 2017 جىلعى جۇمىس جوسپارى مەن ماقساتتى جوبالاردىڭ ورىندالۋى جايىندا ەسەپ بەرىپ، 2018 جىلدىڭ جوسپارىمەن تانىستىردى.

KAZENERGY قاۋىمداستىعى 9 نەگىزگى باعىت بويىنشا جۇمىس اتقاردى. سالىق جانە تاريفتەر، جەر قويناۋىن پايدالانۋ، مۇناي ونىمدەرى مەن سۇيىتىلعان مۇناي گازىنىڭ اينالىمى، ەلەكتر ەنەرگەتيكاسى، ەكولوگيا، جەرگىلىكتى ۇلەستى دامىتۋ، تەحنيكالىق رەتتەۋ، ادامي كاپيتالدى دامىتۋ، حالىقارالىق قىزمەت جانە ساراپتاما سالالارىندا وڭ ناتيجە بار.

«ۇسىنىلعان قۇقىقتىق نورمالاردى قاراۋ پروسەسىندە ەنەرگەتيكا مينيسترلىگىنىڭ جۇمىس توبىمەن 120 وتىرىس وتكىزىلدى، KAZENERGY تاراپى بەلسەنە قاتىستى. ناتيجەسىندە ەنگىزىلگەن 300-دەن استام تۇزەتۋدىڭ 60%-دان استامى قولداۋ تاپتى. 2017 جىلى مۇناي ونىمدەرى مەن سۇيىتىلعان گازدىڭ باعاسىن بەلگىلەۋ ماسەلەسى ءجيى كوتەرىلدى. قاۋىمداستىق قارجى شىعىنىن جانە مۇناي ونىمدەرى نارىعى سۋبەكتىلەرىنىڭ سالىق اۋىرتپالاعىن ازايتۋ، سونداي-اق مۇنايدىڭ ىشكى جانە ەكسپورتتىق باعاسىن تەڭدەستىرۋ ۇسىنىستارىن بەردى»، – دەدى اسەت ماعاۋوۆ.

سونىمەن قاتار كەڭەس وتىرىسىندا قاۋىمداستىقتىڭ 2018 جىلعا ارنالعان بيۋدجەتى بەكىتىلدى.