استانا قالاسىنىڭ ونوماستيكالىق كوميسسياسى ەلوردانىڭ ءتورتىنشى اۋدانىنا بايقوڭىر اتاۋىن بەرۋدى ۇسىندى. بۇل تۋرالى Qamshy.kz اقپارات اگەنتتىگى جەرگىلىكتى ەلوردا ينفو پورتالىنىڭ مالىمەتىنە سۇيەنىپ حابارلادى.

استانا قالاسىنىڭ تىلدەردى دامىتۋ باسقارماسىنىڭ باسشىسى تىلەۋعالي قىشقاشبايەۆتىڭ ايتۋىنشا، بۇعان دەيىن ونوماستيكالىق كوميسسياعا بىرنەشە اتاۋلار ۇسىنىلعان ەكەن. اتاپ ايتقاندا، تاۋەلسىزدىك، قورعالجىن سىندى  تاريحي اتاۋلار بولدى.

«ءتورتىنشى اۋداننىڭ اتاۋى رەتىندە بىرنەشە اتاۋلار كەلىپ ءتۇستى. سونىڭ ءبارىن قاراي وتىرىپ، سىزدەرمەن اقىلداسايىق دەپ الدارىڭىزعا كەلىپ وتىرمىز. استانا ەگەمەندى ەلدىڭ ەلورداسى بولعاندىقتان ونىڭ اتاۋلارى كەلبەتىنە ساي بولۋى كەرەك»، - دەدى  تىلدەردى دامىتۋ باسقارماسىنىڭ باسشىسى تىلەۋعالي قىشقاشبايەۆ.

بۇگىندە بايقوڭىر عارىش ايلاعىنىڭ جۇمىسىنا 60 جىلدان استى.

«ۇلت ماقتانىشتارى توقتار اۋباكىروۆ، تالعات مۇسابايەۆ جانە ايدىن ايىمبەتوۆ وسى بايقور ايلاعىنان  عارىشقا ۇشىپ، ابىرويىمىزدى اسقاقتاتقان بولاتىن. سوندىقتان جاڭا اۋدانعا ادامزات تاريحىندا ورنى بار، اتى التىن ارىپپەن جازىلعان بايقوڭىر اتاۋىن بەرۋدى ۇسىنامىز» - دەدى ونوماستيكالىق كوميسسيا ءتوراعاسى.

قوعامدىق كەڭەسكە قاتىسقان ماسليحات دەپۋتاتتارى كوميسسيا ۇسىنىسىن ءبىراۋىزدان قولدادى. ەندى اتالعان اتاۋ حالىقتىڭ تالقىسىنا سالىنادى.

ايتا كەتەيىك، استانا قالاسىنىڭ ساۋلەت جانە قالا قۇرىلىسى باسقارماسىنىڭ مالىمەتىنشە، ەلوردانىڭ ءتورتىنشى اۋدانىندا شامامەن 150 كوشە بولادى.

 ەلوردادا قۇرىلىپ جاتقان جاڭا اۋدانعا الماتى جانە سارىارقا اۋداندارىنىڭ اۋماعىنان ءىشىنارا 16،5 مىڭ گەكتار جەر بەرىلەدى.