شىمكەنتتە كاسىپكەردەن 7 ملن دوللار بوپسالاعان تانىسى سوتتالدى. وبلىستىق قىلمىستىق ىستەر جونىندەگى مامانداندىرىلعان اۋدانارالىق سوتى ايىپتالۋشى بويكەيحان قايىپنازاروۆتى 7 جىلعا باس بوستاندىعىنان ايىردى، دەپ حابارلايدى Qamshy.kz اقپارات اگەنتتىگى قازاقپاراتقا سىلتەمە جاساي وتىرىپ. 

سوت بارىسىندا 56 جاستاعى ايىپتالۋشىنىڭ قىلمىسى تولىعىمەن دالەلدەنىپ، ول قىلمىستىق كودەكستىڭ 194 بابى «قورقىتىپ الۋ» بويىنشا كىنالى دەپ تانىلىپ، اباقتىعا جابىلدى.

«جازا قىلمىستىق اتقارۋ جۇيەسىنىڭ قاۋىپسىزدىگى اسا جوعارى مەكەمەسىندە وتەۋ بەلگىلەنسىن. جازانىڭ وتەۋ مەرزىمى 2017 جىلدىڭ 15 تامىزىنان باستاپ ەسەپتەلسىن. وعان قاتىستى تاڭدالىنىپ الىنعان بۇلتارتپاۋ شاراسى بۇرىنعىسىنشا كۇزەتپەن ۇستاۋدا قالدىرىلسىن»،- دەدى سوتتا ءىستى قاراعان سۋديا ساميدين تەمىرالييەۆ.

ەستەرىڭىزگە سالا كەتەيىك، بوكەيحان قايىپنازاروۆ شىمكەنتتىك وليگارح سەرىكجان سەيتجانوۆتان 7 ميلليون اقش دوللارىن تالاپ ەتكەن. ول وتكەن جىلدىڭ ءساۋىرى مەن شىلدە ايى ارالىعىندا كاسىپكەردىڭ ۇيالى تەلەفونىنا بىرنەشە رەت حابارلاما جىبەرىپ، قورقىتقان. ياعني ءىرى كولەمدەگى قارجىنى بەرمەسە، كاسىپكەر مەن ونىڭ تۋىستارىنا قاتىستى مالىمەتتەردى عالامتورعا جاريالايتىنىن جازعان. ال، 15 تامىزدا اقشانى الىپ جاتقان كەزىندە قولعا تۇسەدى. سوت بارىسىندا بەلگىلى كاسىپكەر ايىپتالۋشى تانىسىنا ەشقانداي قارىز ەمەس ەكەنىن، قارىزىن كەزىندە وتەپ قويعانىن ايتقان ەدى. ءتىپتى 7 بالاسى بار كۇدىكتىنى كەشىرەتىنىن دە جەتكىزگەن بولاتىن.

ايتا كەتەيىك، سەرىكجان سەيىتجانوۆ «Forbes» دەرەگى بويىنشا ەلىمىزدەگى ەلۋ ىقپالدى بيزمەندەر تىزىمىندە 18ء-شى ورىندا تۇرعان كاسىپكەر. جاقىندا ونىڭ نەمەرەسى مەملەكەت باسشىسىنىڭ نەمەرە ءىنىسى قايرات ساتىبالدىنىڭ قىزىمەن ۇيلەنىپ، سەيىتجانوۆ نازاربايەۆتار اۋلەتىمەن قۇدا بولدى.