بۇگىن اۋىل شارۋاشىلىعى مينيسترلىگىندە ق ر پرەمەر-مينيسترىنىڭ ورىنباسارى – اۋىل شارۋاشىلىعى ءمينيسترى ءو.شوكەيەۆتىڭ توراعالىعىمەن كەڭەيتىلگەن القا وتىرىسى بولىپ ءوتتى، دەپ حابارلايدى Qamshy.kz اقپارات اگەنتتىگى.

مينيسترلىكتە وتكەن كەڭەيتىلگەن القا وتىرىسىندا 2017 جىلعى اتقارىلعان جۇمىس قورىتىندىلارى مەن مەملەكەت باسشىسىنىڭ «ءتورتىنشى ونەركاسىپتىك ريەۆوليۋسيا جاعدايىنداعى دامۋدىڭ جاڭا مۇمكىندىكتەرى» اتتى جولداۋى اياسىندا 2018 جىلعا ارنالعان نەگىزگى مىندەتتەر جايىندا ايتىلدى.

بەينەكونفەرەنسيا بايلانىس ارقىلى جۇرگىزىلگەن شاراعا وبلىستىق اكىمدىكتەردىڭ، اگروبيزنەس جانە قوعام وكىلدەرى قاتىستى.

كەڭەيتىلگەن القا وتىرىسىندا اگروونەركاسىپتىك كەشەن الدىندا ەڭبەك ونىمدىلىگىن ارتتىرۋ جانە وڭدەلگەن اۋىل شارۋاشىلىعى ونىمدەرىن ەكسپورتتاۋدى 2،5 ەسەگە ارتىرۋ مىندەتى جۇكتەلگەنى جايىندا ءسوز بولدى.

«ەڭبەك ونىمدىلىگىن ارتتىرۋ ءۇشىن جاعدايدى تۇبەگەيلى وزگەرتۋگە بولاتىن 4 نەگىزگى باعىتتى انىقتادىق: ءدال قازىرگى زاماناۋي تەحنولوگيالاردى ەنگىزۋ، اۋىل شارۋاشىلىعى تەحنيكاسىن جەدەل تۇردە جاڭارتۋ، مال شارۋاشىلىعىن دامىتۋ جانە سۋارمالى جەرلەردى قارقىندى تۇردە ەنگىزۋ. ءدال وسى باعىتتا مەملەكەتتىك قولداۋ ساياساتى ەنگىزىلەتىن بولادى»، - دەپ اتاپ ءوتتى ق ر پرەمەر-مينيسترىنىڭ ورىنباسارى – اۋىل شارۋاشىلىعى ءمينيسترى ءومىرزاق شوكەيەۆ.

2017 جىلعى اگروونەركاسىپ كەشەنىنىڭ جۇمىسىن قورىتىندىلاپ، اشم ۆيسە-مينيسترى ر.قۇرمانوۆ «2017 جىلعى اگروونەركاسىپتىك كەشەندى دامىتۋ قورىتىندىلارى» تۋرالى بايانداما جاسادى.

«وتكەن جىل ەكونوميكانىڭ اگرارلىق سەكتورى ءۇشىن وتە تابىستى بولدى. اۋىل شارۋاشىلىعى ونىمدەرىنىڭ جالپى ءونىمى 2،9%-عا راتىپ، 4،1 ترلن. تەڭگەنى قۇرادى. سونىمەن قاتار، ازىق-تۇلىك ءوندىرىسى 4،1%-عا ارتتى»، - دەيدى ر.قۇرمانوۆ.

ونىڭ ايتۋىنشا، 2017 جىلدىڭ قورىتىندىسى بويىنشا، اۋىل شارۋاشىلىعى كووپەراتيۆتەرى 19 مىڭ توننا ەت، 132 مىڭ توننا ءسۇت جانە دە 33 مىڭ توننادان استام جەمىس وندىرىلگەن.

اۋىل شارۋاشىلىعى ونىمدەرى مەن ولاردى ەكسپورتتاۋدى 2،5 ەسەگە ارتتىرۋ ماسەلەسىن شەشۋ ءۇشىن اۋىل شارۋاشىلىعى ۆيسە-مينيسترلەرى ءوز باياندامالارىندا اوك-تى دامىتۋدىڭ باستى قادامدارىنا نازار اۋداردى.

اشم ءبىرىنشى ۆيسە-مينيسترى ارمان قايرات ۇلى  ق ر اۋىل شارۋاشىلىعى مينيسترلگىنىڭ 2018 جىلعا ارنالعان جوسپارىمەن تانىستىرىپ ءوتىپ، اوك ءونىمىن 2،5 ەسەگە ارتىرۋ ماسەلەسىنىڭ ماڭىزدىلىعىن اتاپ ءوتتى.

«ءبىزدىڭ الدىمىزدا اگروونەركاسىپ ونىمدىلىگى مەن وڭدەلگەن ونىمدەردى ەكسپورتتاۋدى 2،5 ەسەگە ارتتىرۋ مىندەتى تۇر. وسى مىندەتتەردى ورىنداۋ ءۇشىن ءبىز مينيسترلىكتىڭ نەگىزگى كۇشى مەن رەسۋرستارىن 9 نەگىزگى باعىتقا قاراي اۋدارامىز:

– قارجىلاندىرۋدىڭ قولجەتىمدىلىگىن ارتتىرۋ؛

– ساۋدا نارىقتارىن كەڭەيتۋ جانە اۋىل شارۋاشىلىعى ونىمدەرىنىڭ ەكسپورتىن دامىتۋ؛

– مەملەكەتتىك باقىلاۋ مەن قاداعالاۋ تيىمدىلىگىن ارتتىرۋ؛

– سالىق تولەمدەرىن جەتىلدىرۋ؛

– اگرارلىق عىلىم، ءبىلىم بەرۋ جانە ءبىلىم تاراتۋ جۇيەسىن رەفورمالاۋ؛

– اگروونەركاسىپ كەشەنىن سيفرلاندىرۋ؛

– تەحنولوگيانىڭ قول جەتىمدىلىگى؛

– بيولوگيالىق رەسۋرستاردى وڭتايلى باسقارۋ؛

– سۋ رەسۋرستارىن پايدالانۋ تيىمدىلىگىن ارتتىرۋ.

ءار باعىتتا ولشەنەتىن كورسەتكىشتەر مەن ناقتى شارالار انىق كورسەتىلگەن. ۆيسە-مينيسترلەردىڭ تۇپكىلىكتى ناتيجەلەرگە ارنالعان مىندەتتەرى مەن جاۋاپكەرشىلىگى ارنايى مەموراندۋمدا مينيسترلىكپەن بەكىتىلگەن. مۇنىڭ بارلىعى مينيسترلىكتىڭ 2018 جىلعا ارنالعان جەدەل جوسپارىندا كورىنىس تاۋىپ وتىر. عىلىم، ءبىلىم جانە ءبىلىمدى تاراتۋ؛ اوك-تى سيفرلاندىرۋ؛ تەحنولوگيانىڭ قول جەتىمدى بولۋى – وسى ءۇش بلوكقا مەن ءوزىم تىكەلەي جاۋاپتىمىن»، - دەيدى ارمان قايرات ۇلى.

ونىڭ ايتۋىنشا، اگروونەركاسىپتىك كەشەنىن سيفرلاندىرۋ ءىسى اسا ماڭىزدى بولىپ تابىلادى.

«مۇندا ەڭ باستى كۇتىلەتىن ماسەلە ناقتى فەرمەرلىك شارۋاشىلىقتار مەن «اقىلدى فەرمالار» ەلەمەنتتەرىن ەنگىزۋگە باستى نازار اۋدارىلاتىن بولاتىن. ءبىرىنشى كەزەڭدە ءبىز گەوپوزياسيالىق، ۆەگەتاتيۆتىك، اگروحيميالىق، گيدروگەولوگومەليوراتيۆتىك جانە مەتەرەولوگيالىق قاباتتارىمەن ەلەكتروندىق كارتا ورىندارىن جاساۋ قاجەتتىلىگىن كورىپ وتىرمىز»، - دەپ ايتىپ ءوتتى ءبىرىنشى ۆيسە-مينيستر ارمان قايرات ۇلى.

ونىڭ ايتۋىنشا، ونەركاسىپتى سيفرلاندىرۋ مەملەكەتتىك زاڭدار مەن قاداعالاۋدىڭ سەنىمدىلىگىن ارتتىرادى، جوعارى تەحنولوگيالاردى ەنگىزۋگە ىنتالاندىرادى، مەملەكەتتىك قولداۋ شارالارىنىڭ تيىمدىلىگىن ارتتىرىپ، ولاردىڭ اشىقتىعى مەن فەرمەرلەرگە قول جەتىمدىلىگى، سىبايلاس جەمقورلىق كورىنىستەرىن ازايتادى ەكەن.

سونداي-اق، ۆيسە-مينيستر ر.قۇرمانوۆ پەن «قازاگرو» ۇبح» اق باسقارما ءتوراعاسى ن:مالەلوۆ 2017 جىلعا ارنالعان اگروونەركاسىپتىك كەشەندى دامىتۋ قورىتىندىلارىن باياندادى.