بۋراباي اۋدانىنىڭ ورتالىعى ششۋچينسك قالاسىنداعى №7 مەكتەپ-ليسەيىندە ەلباسى نۇرسۇلتان نازاربايەۆتىڭ «بولاشاققا باعدار: رۋحاني جاڭعىرۋ» اتتى باعدارلامالىق ماقالاسىن ناسيحاتتاۋ ماقساتىندا اۋداندىق «رۋحاني جاڭعىرۋ» كابينەتىنىڭ اشىلۋ سالتاناتى ءوتتى، دەپ حابارلايدى Qamshy.kz اقپارات اگەنتتىگى اقمولا وبلىسى ىشكى ساياسات باسقارماسىنىڭ وڭىرلىك كوممۋنيكاسيالار قىزمەتىنە سىلتەمە جاساي وتىرىپ.
«رۋحاني جاڭعىرۋ» كابينەتى – تۋعان جەردىڭ تاريحىنا، ادەبيەتىنە، سالت-داستۇرىنە دەگەن سۇيىسپەنشىلىگىن ارتتىرۋ، ازاماتتاردىڭ بويىندا پاتريوتتىق سەزىمدەرىن قالىپتاستىرۋ ماقساتىندا قۇرىلدى.
اتالعان كابينەتتىڭ اشىلۋ سالتاناتىنا بۋراباي اۋدانىنىڭ اكىمى قانات قاراۋىلوۆ، اۋدان اكىمىنىڭ ورىنباسارى مارپۋعا نۇرپانوۆا، اۋداندىق ءماسليحاتتىڭ حاتشىسى وتەلباي بەيسەنوۆ، ارداگەرلەر كەڭەسىنىڭ ءتوراعاسى مالگەلدى جۇماعۇلوۆ، وبلىستىق ءبىلىم باسقارماسىنىڭ وقۋ-ادىستەمەلىك كابينەتىنىڭ ءبولىم باسشىسى سۇلۋشاش قوجاحمەتوۆا، ءبىلىم ءبولىمىنىڭ باسشىسى جانگەلدى تولەگەنوۆ، اۋداندىق مادەنيەت جانە تىلدەردى دامىتۋ ءبولىمىنىڭ باسشىسى دينا قارسىبايەۆا، كوللەدج، مەكتەپ، بالاباقشا باسشىلارى، اۋدان كىتاپحاناشىلارى، ەڭبەك ارداگەرلەرى جانە جوعارى سىنىپ وقۋشىلارى قاتىستى.
«رۋحاني جاڭعىرۋ» كابينەتىنىڭ اشىلۋ شەڭبەرىندە قاتىسۋشىلاردىڭ نازارىنا ءبىرىنشى قاباتتاعى كيىز ۇيدە «اۋىلىم التىن بەسىگىم» اتتى قازاقتىڭ سالت-داستۇرىنەن كورىنىس كورسەتىلدى. قوناقتار داستارحانعا قويىلعان ۇلتتىق تاعامدارمەن تانىستىرىلىپ، كيىز ءۇيدىڭ سىرتىندا بالالاردىڭ قاتىسۋىمەن وتكىزىلگەن ۇلتتىق ويىنداردى تاماشالادى.
ەكىنشى قاباتتاعى تەحنولوگيا كابينەتتەرىندە وقۋشىلاردىڭ قولىمەن جاسالعان ۇلتتىق تاعامدار جانە قولونەر بۇيىمدارىنان كورمە ۇيىمداستىرىلدى. شاكىرتتەر كورمەدەگى ءاربىر زاتتىڭ جاسالۋ جولىمەن، قۇرامىمەن تانىستىردى. سودان كەيىن مەكتەپتىڭ سپورت زالىندا ۇمىت بولعان ۇلتتىق ويىندار وتكىزىلگەن. سونىمەن قاتار، اۋدانداعى دارىندى جانە تالاپتى جاستارىدىڭ عىلىمي جۇمىستارىنان كورمە ۇيىمداستىرىلىپ، كەلگەن قوناقتار ۇزدىك جۇمىستارمەن تانىستىرىلعان. قاتىسۋشىلار مەكتەپتىڭ ءۇشىنشى قاباتىندا ورنالاسقان «رۋحاني جاڭعىرۋ» كابينەتىنىڭ سالتاناتتى اشىلۋ راسىمىندە دە بولدى.
«رۋحاني جاڭعىرۋ» كابينەتىن سالتاناتتى تۇردە اشۋ قۇرمەتى بۋراباي اۋدانىنىڭ اكىمى ق.قاراۋىلوۆقا بەرىلدى.
كابينەتتى پرەزەنتاسيالاۋ بارىسىندا ونىڭ كەلەسى بولىمدەردەن تۇراتىنى باياندالدى: «تۋعان ولكە تابيعاتى»، «بۋرابايىم – التىن بەسىك تەربەتىلگەن»، «وتكەننەن ەلەس»، «تاريح بەتتەرىنەن»، «تاريحي تۇلعالار»، «وتكەن كۇننىڭ تاريحى»، بايانداۋ نەگىزىنە فوتوسۋرەتتەر قولدانىلدى. سول سياقتى، قازاق ەلى تاريحىنان سىر شەرتەتىن كىتاپتار مەن لاتىن ءالىپبيىنىڭ ۇلگىسى تانىستىرىلىپ، تەلەديداردان «رۋحاني جاڭعىرۋ» باعدارلاماسى جايلى بەينەروليكتەر كورسەتىلدى.
بۇل كابينەت بولاشاقتا جاس ۇرپاقتىڭ تاربيەسىنە وزىندىك قوماقتى ۇلەسىن قوساتىنى ءسوزسىز.
