استانادا جەر تۋرالى زاڭ جوباسىنا قاتىستى قوعامدىق تالقىلاۋ بولدى. مۇحتار تايجان جۇرگىزگەن القالى جيىنعا اۋىل شارۋاشىلىعى مينيسترلىگىنىڭ وكىلدەرى، ءماجىلىس دەپۋتاتتارى جانە ءار وڭىردەن قوعام بەلسەندىلەرى قاتىستى، دەپ مالىمدەيدى Qamshy.kz اقپارات اگەنتتىگى.

جەر تۋرالى زاڭدى قوعامدىق تالقىلاۋدا جەلتوقسانشى، جەر كوميسسياسىنىڭ مۇشەسى نۇرلىبەك قۋانبايەۆ «شەتەل ازاماتتارىنا جەر ساتىلماۋى كەرەك، جالعا بەرىلمەۋى كەرەك» دەگەن پوزيسيادا قالاتىنىن ايتتى.

– نەگىزگى ايتايىن دەگەنىم – بۇگىنگى قوعامداعى قايشىلىقتار، الەۋمەتتىك جەلىدە «مۇحتار ونداي، ايدىن مۇنداي»، مۇحتار مەن ماقسات نەمەسە ايدىن مەن ماقسات دەپ ءبولىنىپ الىپ، جەكە باسقا ءتيىسىپ جاتادى. مۇنداي قوعامداعى قايشىلىقتاردى جويۋ كەرەك. بارلىعىمىزدىڭ دا جەرگە ءبىر ادامداي جانىمىز اشيدى، سوندىقتان دا مامىلەگە كەلىپ، ءبىر جەڭنەن قول، ءبىر جاعادان باس شىعارىپ، ءبىر جۇدىرىقتاي جۇمىلا ءبىلۋىمىز قاجەت. بارشاڭىزدى وسىعان شاقىرامىن. ۇرىس-كەرىسپەن ەشتەڭە دە بىتپەيدى، سوندىقتان ەڭ الدىمەن اۋىزبىرشىلىگىمىز مىقتى بولۋى كەرەك، - دەدى نۇرلىبەك قۋانبايەۆ.

زاڭگەر، قوعام بەلسەندىسى ايگۇل ورىنبەك تە ءوز پىكىرىن ورتاعا سالدى.

– وسى جەر داۋىنان كەيىن ءبىراز ادامدار قۋدالاندى، ونى وزدەرىڭىز جاقسى بىلەسىزدەر. قازىرگى تاڭدا دا قۋدالانىپ جاتىر. ءبىراق ءبىزدىڭ ماقساتىمىز سول ۋاقىتتا جەر كوميسسياسى قۇرىلىپ، بيلىكتىڭ بىزبەن اشىق جۇمىس ىستەۋى ەدى. بۇگىندە، مىنە، جەر كوميسسياسى قۇرىلدى، بيلىكتەگى اعالارىمىز تومەن ءتۇستى حالىقتىڭ اراسىنا. دەمەك، ءبىزدىڭ ماقساتىمىز ورىندالدى. الداعى ۋاقىتتا كوميسسيا مەن ءبىز كونستيتۋسياعا، كودەكستارعا ەنگىزىلەتىن زاڭداردى قاراۋىمىز كەرەك، ءالى كوپتەگەن كەمشىلىك بار. سونىمەن قاتار قوعام بەلسەندىلەرىنە شابۋىلدى توقتاتۋ كەرەك. ۇلتىم، جەرىم دەپ وتىرعان اعايىندارعا ايتارىم: جاستاردىڭ بەلسەندىلىگىن پايدالانىپ، ولاردى قولشوقپار قىلۋدى توقتاتايىق. سەبەبى« ەرتەڭ ءبىز جاستاردىڭ ساعىن سىندىرامىز. جەر كوميسسياسى قۇرىلعان كەزدە ءبىز جەرىمىزدى ساقتاپ قالايىق، - دەپ قىسقا قايىردى قوعام بەلسەندىسى.