مەملەكەتتىك حاتشى تۇركيا رەسپۋبليكاسىنا جۇمىس ساپارى بارىسىندا قازاق دياسپوراسى جانە قازاقستاندىق ستۋدەنتتەر قوعامداستىعى وكىلدەرىمەن كەزدەستى. تۇركياداعى قازاق دياسپوراسى وتكەن عاسىردىڭ ەلۋىنشى جىلدارى قالىپتاسا باستادى. بۇگىندە وعان 10 مىڭعا جۋىق ادام مۇشە.

كەزدەسۋ مەملەكەت باسشىسىنىڭ «ءتورتىنشى ونەركاسىپتىك ريەۆوليۋسيا جاعدايىنداعى دامۋدىڭ جاڭا مۇمكىندىكتەرى» اتتى جولداۋىنىڭ باستى ەرەجەلەرىن تالقىلاۋعا ارنالدى. مەملەكەتتىك حاتشى بۇگىندە قازاقستان رەسپۋبليكاسىنىڭ تابىستى ءارى زاماناۋي مەملەكەتكە اينالعانىن اتاپ ءوتتى. بۇل – نۇرسۇلتان نازاربايەۆتىڭ حالىقتىڭ ءال-اۋقاتىن جان-جاقتى ارتتىرۋعا باعىتتالعان ستراتەگيالىق باعدارىن ىسكە اسىرۋ ناتيجەسىندە مۇمكىن بولعان جەتىستىك. 2017 جىلدىڭ قورىتىندىسى بويىنشا ءىجو ءوسىمى – 4 پايىزدى، ينفلياسيا دەڭگەيى – 7،1 پايىزدى، جۇمىسسىزدىق دەڭگەيى – 5 پايىزدى قۇرادى.

گۇلشارا ءابدىقالىقوۆا بىلتىردان بەرى ەكونوميكانىڭ جاڭا مودەلىن قالىپتاستىرۋعا، ساياسي رەفورما جۇرگىزۋگە جانە قوعامدىق سانانى جاڭارتۋعا باعىتتالعان ەلدىڭ ءۇشىنشى جاڭعىرۋى جۇزەگە اسىرىلىپ جاتقانىن ايتتى. جاڭعىرۋ ۇدەرىستەرىنىڭ وزەگى «رۋحاني جاڭعىرۋ» جوباسى بولىپ سانالادى.

گ.ءابدىقالىقوۆا جولداۋدا مەملەكەت باسشىسىنىڭ يندۋستريا – 4.0 ەلەمەنتتەرىن ەنگىزۋگە باسا ءمان بەرگەنىنە نازار اۋداردى. سوندىقتان ءبىرىنشى باسىمدىق جاڭا تەحنولوگيالىق قۇرىلىمعا قول جەتكىزۋگە نەگىزدەلگەن ەكونوميكالىق ءوسىمدى قامتاماسىز ەتۋگە باعىتتالعان.

جولداۋدا جاڭعىرۋدىڭ نەگىزى رەتىندە ادام كاپيتالىنىڭ ماڭىزى ەرەكشە اتاپ وتىلگەن. بۇكىل حالقىمىزدى قامتيتىن ءوزىمىزدىڭ ءبىلىم بەرۋ جۇيەسىن قالىپتاستىرۋدى جەدەلدەتۋ مىندەتى قويىلدى. بۇل رەتتە ءاردايىم وزگەرىستەرگە بەيىم بولۋ جانە جاڭا ءبىلىمدى مەڭگەرۋ قابىلەتىن دامىتۋ نەگىزگى باسىمدىققا اينالماق.

قازاقستان قوعامىنىڭ يدەالى ايقىندالدى، ول – ءوزىنىڭ تاريحىن، ءتىلىن، مادەنيەتىن بىلەتىن، سونداي-اق زامانىنا لايىق، شەت تىلدەرىن مەڭگەرگەن، وزىق ءارى جاھاندىق كوزقاراسى بار قازاقستاندىق.

مەملەكەتتىك حاتشى جولداۋدا قويىلعان باستى مىندەتتى اتاپ ءوتتى. ول: «ءبىز جاڭا زامانعا ساي بولۋ ءۇشىن ءتورتىنشى ونەركاسىپتىك ريەۆوليۋسيا جاعدايىنداعى تاريحي ورلەۋ باستاۋىندا تۇرعان ءبىرتۇتاس ۇلت بولۋىمىز كەرەك».

سوڭىندا گۇلشارا ءابدىقالىقوۆا كەزدەسۋگە قاتىسۋشىلاردى تاريحي وتانىمەن بايلانىستى نىعايتا بەرۋگە، وزدەرىنىڭ پايدالى ەڭبەگى مەن ۇزدىك ءبىلىمى ارقىلى قازاقستاننىڭ دامۋىنا، جاھاندىق قوعامداستىقتىڭ ماڭىزدى ءارى جاۋاپتى مۇشەسى رەتىندەگى ەلىمىزدىڭ حالىقارالىق بەدەلىن ارتتىرا تۇسۋگە ءوز ۇلەستەرىن قوسۋعا شاقىردى.