بۇگىن استانادا پارلامەنت ءماجىلىسىنىڭ دەپۋتاتتارى، ق ر اۋىل شارۋاشىلىعى مينيسترلىگىنىڭ وكىلدەرى جانە قوعام بەلسەندىلەرى جەر تۋرالى زاڭ جوباسىن تالقىعا سالدى، دەپ جازادى Qamshy.kz اقپارات اگەنتتىگى. .

العاشقى بولىپ ءسوز العان ولكەتانۋشى ساعات ءجۇسىپ جەر ماسەلەسىن ەموسياعا بەرىلمەي، كوتەرىلىسكە شىعىپ دۇربەلەڭ سالماي، وركەنيەتتى تۇردە وسىنداي وتىرىستاردا شەشۋگە شاقىردى.

– بۇگىن ءبىز قازاقتىڭ بولاشاعىن ايقىندايتىن ماسەلە بويىنشا جينالىپ وتىرمىز. بۇگىن بىزگە بارلىق قازاق جۇرتشىلىعى قاراپ وتىر. بۇگىن بارلىق قوعام وكىلدەرى، بيلىك، پارلامەنت، باسقا دا ازاماتتار وسى قازاقتار وزدەرىنىڭ قاسيەتتى، كيەلى ماسەلەسى – جەر ماسەلەسىن ايقاي-شۋسىز، ءبىر مامىلەگە كەلىپ، ءبىرىن-بىرى تىڭداپ شەشە الادى ما ەكەن دەپ كۇتىپ وتىر. وسىدان ەكى جىل بۇرىن ءبىز بۇل ماسەلەنى ميتينگكە شىعىپ شەشكەن ەدىك، ناتيجەسىندە بەس جىلعا شەگەرىلگەن بولاتىن. بۇگىندە، مىنە، بەس جىلداي ۋاقىت ءوتتى، ەندى ءوزىمىزدىڭ قانشالىقتى وركەنيەتتى ەكەنىمىزدى، ساياسي مادەنيەتىمىزدىڭ وسكەندىگىن كورسەتۋىمىز كەرەك، – دەدى ولكەتانۋشى ساعات ءجۇسىپ.

ارنايى بايانداما جاساعان ۆيسە-مينيستر ەرلان نىسانبايەۆ جەر تۋرالى زاڭ جوباسى ءتورت سۇراق شەڭبەرىندە دايىندالعانىن اتاپ ءوتتى. ونىڭ ايتۋىنشا، زاڭ جوباسىندا جەردى شەتەلدىكتەرگە جالعا بەرۋ جايىندا ەشقانداي نورما قاراستىرىلماعان ەكەن.

– ءبىر پايىز بولسا دا شەتەلدىكتەردىڭ ۇلەسى بار قازاقستاندىق كومپانيالارعا، زاڭدى تۇلعالارعا جەر بەرىلمەيتىن بولادى. ماسەلە وتە كۇردەلى. مۇنى 2022 جىلعا دەيىن حالىقپەن بىرگە تالقىلاپ، ءبىر شەشىمگە كەلۋ كوزدەلۋدە، – ۆيسە-مينيستر.

سونىمەن قاتار ەرلان نىسانباي ۇلى قانداي دا ءبىر سۇراقتار بولسا، حالىقپەن تالقىلاپ شەشۋگە دايىن ەكەنىن جەتكىزدى.

ال ءماجىلىس دەپۋتاتى بەرىك وسپانوۆ «پارلامەنت جەر تۋرالى زاڭدى ءبىرجاقتى قابىلداپ تاستادى» دەگەن اڭگىمە بولماسىن دەپ، زاڭ جوباسىنىڭ قوعامدىق تالقىلاۋعا شىعارىلعانىن ايتتى.

زاڭگەر ابزال قۇسپان جەردى ساۋداعا سالۋعا قارسى ەكەنىن ايتا كەلىپ، زاڭ جوباسىنىڭ تۇيتكىلدى جەرلەرىن تۇيرەپ ءوتتى.

– ءبىز ءبىر نارسەنى شاتاستىرمايىق، ءقازىر مىنا جەردە قارالىپ جاتقان ماسەلە – زاڭ جوباسى. پارلامەنتتە باقىلاۋ تەتىكتەرى جوق، ەگەر ءبىر جەر كەتىپ قالدى دەسە، پارلامەنت ونى بارىپ قايتارىپ الا المايدى، ونداي قۇزىرەت پارلامەنتتە جوق. زاڭ جوباسىمەن مەنىڭ كەلىسەتىن دە، كەلىسپەيتىن دە جەرلەرىم بار. ەڭ الدىمەن ءبىر نارسەنى ءبىلىپ الايىق – جەر ءوزى كاتەگوريا بويىنشا جەتىگە بولىنەدى: اۋىل شارۋاشىلىعى ماقساتىنداعى جەر، اۋىل شارۋاشىلىعى ماقساتىنداعى ەمەس جەر، تاعى دا باسقا، ودان كەيىنگىلەر ونشا ماڭىزدى ەمەس. بىزگە ەڭ ماڭىزدىسى – اۋىل شارۋاشىلىعى ماقساتىنداعى جەرلەر. بۇل جەرگە قاتىستى 2021 جىلدىڭ جەلتوقسان ايىنا دەيىن ماراتوريي  بەرىلگەن.

مەنىڭ كوڭىلىمە كۇدىك ۇيالاتاتىن ءبىر ماسەلە – اۋىل شارۋاشىلىعى ماقساتىنداعى ەمەس جەرلەر. ول جاي عانا قۇرىلىستار، قورعانىس ماقساتىنداعى جەرلەر، عيمارات استىنداعى جەرلەر، پوليگون، ترانسپورتقا ارنالعان جەرلەر – مىنە، مۇنىڭ اۋقىمى وتە كەڭ، – دەدى زاڭگەر.

ول ءوز سوزىندە جۇڭگو مەن رەسەيدەن ءتونىپ تۇرعان قاۋىپ-قاتەرگە الاڭداۋشىلىق ءبىلدىردى.

– باتىس قازاقستان وبلىسى، بوكەي ورداسى، بىرنەشە اۋدان، ودان ارى قاراي اتىراۋ، اقتاۋعا دەيىن رەسەيدىڭ پوليگونىنا جالعا بەرىلگەن. الەمدە ءبىر دە ءبىر تاۋەلسىز مەملەكەت اسكەري پوليگوندارىن وزگە مەملەكەتكە جالعا بەرىپ، ول جەرگە سىناق جۇرگىزدىرىپ قويمايدى. بۇل – سۇمدىق جاعداي، – دەپ اشىندى ابزال قۇسپان.

الايدا ءۇش جارىم ساعاتقا سوزىلعان جيىندا ازاماتتار ءبىر شەشىمگە توقتاي المادى. جيىن سوڭىندا ءار وڭىردەن كەلگەن قوعام بەلسەندىلەرى نارازىلىق تانىتىپ، «ءوز پىكىرىمىزدى ايتا المادىق، ءبىزدىڭ ءسوزىمىزدى ەشكىم قۇلاعىنا ىلگەن جوق»، - دەپ شاعىمدانىپ كەتتى.