تۇركسوي حالىقارالىق ۇيىمىنىڭ ءداستۇرلى "باسپا ءسوز سىيلىعى" تابىستالدى، دەپ جازادى Qamshy.kz اقپارات اگەنتتىگى.

تۇركيانىڭ كاستامونۋ قالاسىندا تۇركسوي-عا مۇشە ەلدەر وكىلدەرىنىڭ قاتىسۋىمەن 2017 جىلدى قورىتىندىلاۋ جيىنى ءوتتى. تۇركسوي حالىقارالىق ۇيىمى ۇيىمداستىرعان سالتاناتتى شارادا تۇركىتىلدەس ەلدەردىڭ رۋحاني ومىرىنە ۇلەس قوسقان ءبىرقاتار ازاماتتارعا ۇزدىكتەر پرەمياسى تابىستالدى.
مارتەبەلى جيىنعا تۇركسوي ۇيىمىنىڭ باس حاتشىسى دۇيسەن قاسەيىنوۆ، تۇركيانىڭ مادەنيەت جانە تۋريزم ءمينيسترىنىڭ ورىنباسارى حۋسەين يايمان، كاستامونۋ قالاسىنىڭ گۋبەرناتورى ياشار كارادەنيز، كاستامونۋ قالاسىنىڭ باسشىسى تاحسين باباش جانە تۇركيانىڭ ءبىرقاتار قالالارىنداعى گۋبەرناتورلار مەن اكىمدەرى، تۇركى ەلدەرىنىڭ وكىلدەرى قاتىستى.

وسى ورايدا 2017 جىلعى  "تۇركىستان-تۇركى الەمىنىڭ مادەني استاناسى" جوباسىن ناسيحاتتاۋعا ەرەكشە ۇلەس قوسقان قازاقستان، قىرعىزستان، تاتارستان، باشقۇرتستان، گاگاۋزيا جانە سولتۇستىك كيپر، بولگاريا، ماكەدونيا، تۇركيا ەلدەرىنىڭ اقىن-جازۋشىلارى مەن جۋرناليستەرىنە تۇركسوي-دىڭ ءداستۇرلى «باسپا ءسوز سىيلىعى» بەرىلدى.

سونداي-اق، تۇركى ەلدەرىنە ورتاق ماڭىزدى ءىس-شارالاردى كەڭىنەن ناسيحاتتاۋدا ايرىقشا ۇلەس قوسقانى ءۇشىن ءبىزدىڭ ەلىمىزدەن وڭتۇستىك قازاقستان وبلىسىنىڭ مادەنيەت جانە تىلدەردى دامىتۋ باسقارماسى، وبلىستىق مادەنيەت جانە حالىق شىعارماشىلىعى ورتالىعىنىڭ رەداكتورى مادينا ايتپەنبەتوۆا مەن «كازينفورم» حالىقارالىق اقپاراتتىق اگەنتتىگىنىڭ رەداكتورى جانار مۇحامەدياروۆا دا بار.