شقو ءبىلىم باسقارماسىنىڭ وبلىستىق قوسىمشا ءبىلىم بەرۋ جانە دەنە شىنىقتىرۋ ورتالىعى، سەمەي قالاسىنىڭ «ءبىلىم-يننوۆاسيا» ليسەيى جانە وسكەمەندەگى «نۇروردا» مەكتەپ –ليسەيى بىرلەسە وتىرىپ قازاق تىلىنەن رەسپۋبليكالىق «جارقىن بولاشاق» وليمپياداسىنىڭ وبلىستىق كەزەڭىن ۇيىمداستىردى.

- ءبىز وقۋشىلاردىڭ مەملەكەتتىك تىلگە دەگەن قىزىعۋشىلىعىن وياتۋدى كوزدەي وتىرىپ، قازاق حالقىنىڭ ءسالت-داستۇرى، ادەبي جانە رۋحاني مۇراسىن ناسيحاتتاۋدى قولعا الدىق. مۇنداي بايقاۋلار ارقىلى وقۋشىلاردىڭ شىعارماشىلىق قابىلەتى مەن مادەني كوزقاراسىن دامىتۋدى ماقسات تۇتىپ وتىرمىز،- دەيدى بايقاۋدىڭ ۇيىمداستىرۋشىلارى.

ءبىلىم سايىسىندا 7-10 سىنىپ وقۋشىلارىنىڭ مەملەكەتتىك ءتىلدى مەڭگەرۋ دەڭگەيى مەن قازاق حالقىنىڭ ادەبيەتى، تاريحى جانە ءسالت-داستۇرى بويىنشا بىلىمدەرى سىنالاماق.

جىل سايىنعى ءداستۇرلى وليمپيادا اۋداندىق، وبلىستىق جانە رەسپۋبليكالىق كەزەڭدەردەن تۇرادى. بايقاۋعا قاتىسۋشىلار «تىلشى-ادەبيەتشىلەر»، «ءسوز شەبەرلەرى»، «ءانشى بۇلبۇلدار»، «جاس عالىمدار»، «جازۋشىلار» اتتى بەس باعىت بويىنشا ب ا ق سىنايدى.