19 اقپاندا AIBA اكادەمياسىندا وتكەن قازاقستان جانە وزبەكستان قۇرامالارى اراسىنداعى كەزدەسۋدە مىرزاعالي ايتجانوۆتىڭ شاكىرتتەرى 6:4 ەسەبىمەن جەڭىسكە جەتتى. قازاقستاندىق بوكس چەمپيونى دانيار ەلەۋسىنوۆ سۋديا شەشىمىمەن وزبەكستاندىق بوبوۋسمون باتۋروۆتان ۇستەم ءتۇستى، دەپ حابارلايدى Qamshy.kz اقپارات اگەنتتىگى.

ريو-دە جانەيرودا وتكەن وليمپيادادان كەيىن ەكىنشى رەت جەكپە-جەككە شىعىپ تۇرعان ەلەۋسىنوۆ دايىندىعىنىڭ از بولعانىن ايتتى.

–قارسىلاسىم – مىقتى بوكسشى. حالىقارالىق وليمپيادالاردا بوي كورسەتىپ جۇرگەن جىگىت. ەكەۋمىزدىڭ جەكپە-جەگىمىز وڭايعا سوققان جوق.  ءوزىم جەكپە-جەككە 100 پايىز دايىندالدىم دەپ ايتا المايمىن. بۇل وليمپيادادان كەيىنگى ەكىنشى جۇدىرىقتاسۋىم. رينگكە شىقپاعانىمدى ەسكەرسەك، بۇگىنگى جەكپە-جەك قاناعاتتاندىرارلىقتاي بولدى دەپ ويلايمىن، - دەدى بوكسشى.

سونىمەن قاتار، الداعى جوسپارلارىمەن دە ءبولىستى.

–ءبىز ازيا ويىندارىنا دايىندالىپ جاتىرمىز. باستى مىندەت – جەڭىسكە جەتۋ، - دەدى دانيار ەلەۋسىنوۆ.

ەلەۋسىنوۆ قازىرگى تاڭدا قازاقستان قۇراماسىنىڭ اتىنان جارىستارعا شىعۋعا دايىندالىپ ءجۇر. ال ناۋرىزدىڭ باسىندا قازاقستاندىق بوكسشىلار پولشا مەن فينلياندياداعى تۋرنيرگە اتتانادى.