مس سايلاۋبەكتىڭ ەسىمىن وقۋ قۇرالىنا ەنگىزگەن اۆتور ءوز قاتەسىن مويىنداپ وتىر، دەپ حابارلايدى Qamshy.kz اقپارات اگەنتتىگى.

الەۋمەتتىك جەلى قولدانۋشىلارى قازاق تىلىنە ارنالعان تەست جيناعىندا مس سايلاۋبەك تۋرالى جازىلعانىنا نارازىلىق ءبىلدىرىپ جاتىر.

Qamshy.kz اقپارات اگەنتتىگى كىتاپ اۆتورلارىنىڭ ءبىرى قازبەك ساعيدولدامەن سويلەسىپ، ءمان-جايدى بىلگەن ەدى. قۇراستىرۋشىنىڭ سوزىنشە، رەپەردىڭ ەسىمى كىتاپقا بايقاۋسىزدا ەنىپ كەتكەن.

– بۇل نەگىزى دايىندىققا ارنالعان ءماتىن ەدى. ال ماتىندەردى ءبىز ءارتۇرلى ورتالىقتان جيناپ، باسپاعا جىبەرەمىز. سوندا دايىندىققا ارنالعان ءماتىننىڭ ءبىر بولىگىن جىبەرگەنىمىزدە ماتەريالدىق بازاداعى وسى ءماتىن دە كەتىپ قالىپتى. ونى كىتاپ شىققان سوڭ ءبىراق بايقادىق. بۇل جاعدايدان كەيىن قاتەمىزدى ەسكەرىپ، كەلەسى باسىلىمنان سايلاۋبەك تۋرالى مالىمەتتى الىپ تاستادىق، – دەدى قازاق ءتىلى ءپانىنىڭ ءمۇعالىمى.

ول مس سايلاۋبەكتى كىتاپقا سانالى تۇردە قوسپاعانىن ايتىپ، حالىقتان كەشىرىم سۇرادى.

– ءبىزدىڭ ماقساتىمىز – سايلاۋبەكتى ناسيحاتتاۋ ەمەس، وقۋشىلاردى دايىنداۋ. بىلتىر شىعارعانىمىزدا مۇنداي بولماعان ەدى، بيىل كەلەڭسىز جاعدايعا تاپ بولدىق. ءوز قاتەمىزدى مويىندايمىز. بۇل وقۋ قۇرالىندا قامتىلعان 400 سۇراقتىڭ ءبىرى عانا بولسا دا، كەشىرىم سۇرايمىز. ەلدەن بيىك ەمەسپىز، - دەدى قازبەك ساعيدولدا.

نازاربايەۆ زياتكەرلىك مەكتەبىنە تۇسۋشىلەرگە ارنالعان بۇل تەست جيناعى 2018 جىلدىڭ باسىندا 100 دانا بولىپ شىققان ەكەن. ال سايلاۋبەككە قاتىستى ءماتىننىڭ قاي ورتالىقتان الىنعانى بەلگىسىز.