شىعىس قازاقستان وبلىسىندا تۇڭعىش رەت جەتى اتا تۋرالى كوركەم فيلم ءتۇسىرىلدى. كينوتۋىندى الداعى ناۋرىز ايىنىڭ 3-5 كۇندەرى ارالىعىندا اۋداندىق مادەنيەت ۇيىندە كورسەتىلە باستايدى.

كوركەم ءفيلمنىڭ جالپى بيۋدجەتى 2 ملن 300 مىڭ تەڭگەنى قۇراعان. كينوتۋىندىنىڭ جالپى مازمۇنىندا نەگىزىنەن جاستاردى اتا-تەكتەرىن ۇمىتپاي، جەتى اتاسىن بىلۋگە شاقىرۋ يدەياسى قامتىلعان.

«فيلمگە كوپتەگەن اۋدان جاستارى مەن ءوڭىرىمىزدىڭ بەدەلدى كاسىپكەرلەرى كومەك قولىن سوزدى. اتاپ ايتساق، حالىق تۇسىرۋگە قاجەتتى كولىك، ءۇي تاعى باسقا ماتەريالدىق كومەك كورسەتتى»، - دەيدى ءفيلمنىڭ باس پروديۋسسەرى فارحات سۇلەيمەنوۆ. 

ايتا كەتەرلىگى، ق ر ەڭبەك سىڭىرگەن ءارتىسى، «قۇنانباي» ءفيلمىنىڭ رەجيسسەرى دوسقان جولجاقسىنوۆ ءۇرجارعا كەلگەن ساپارىندا كينونىڭ مازمۇنىمەن تانىسىپ، «ءتاڭىر» كينوستۋدياسى دەپ اتاپ، اق باتاسىن بەرىپ كەتكەن ەكەن. 

ءتۇسىرىلىم وتكەن جىلدىڭ ماۋسىم ايىندا قولعا الىنعان. فيلمدەگى باستى رولدەرگە جەرگىلىكتى تەاتر اكتەرلارى مەن ءۇرجار جاستارى تارتىلىپ وتىر. اتاپ ايتقاندا، باستى رولدەردى تۇران ۋنيۆەرسيتەتىنىڭ 2-كۋرس ستۋدەنتى بولات سۇلەيمەنوۆ پەن سەمەي قالاسىنداعى مۋزىكالىق كوللەدجىنىڭ 1-كۋرس ستۋدەنتى جانەركە نۇرجاۋوۆا، «كەرۋەن» حالىقتىق تەاترىنىڭ اكتەرى، اۋداندىق مادەنيەت ءۇيىنىڭ ءارتىسى سەرىك شاكەنوۆ، انار سادىقوۆالار سومداعان.

كوركەم تۋىندى ءۇرجار اۋىلىندا تۇسىرىلگەن. وتتاي ىستىق ماحاببات، شىنايى سەزىم، ءۇمىت كۇتەر ىزدەنىس، جاۋابى جوق سۇراقتار، وكىنىش پەن جانايقاي، ءومىر ءۇشىن كۇرەس - وسىنىڭ ءبارى فيلمدە كورىنىس تابادى.

فيلمدەگى عاشىقتاردىڭ باسىنداعى شىرعالاڭ دا وسى اتا داستۇرىمەن تىعىز بايلانىسىپ، ماحاببات وقيعاسىنىڭ اياعى باقىتتى وتباسىنىڭ جەتى اتانى ۇرپاققا دارىپتەۋىمەن تۇيىندەلەدى.