شىعىس قازاقستان وبلىسى ءۇرجار اۋدانىنداعى ەلدى مەكەندەردىڭ تەك 50 پايىزى عانا تازا اۋىزسۋمەن قامتاماسىز ەتىلگەن. 2020 جىلعا قاراي تىرشىلىك نارىنە اۋىل حالقىنىڭ 85 پايىزى قول جەتكىزەدى دەپ كۇتىلۋدە. بۇل تۋرالى ءۇرجار اۋدانىنىڭ اكىمى سەرىك زاينۋلدين اۋدان تۇرعىندارى الدىندا ەسەپ بەرۋ بارىسىندا ايتتى. ايتا كەتەيىك، اۋدان اكىمىنىڭ ەسەپتى جيىنىنا شىعىس قازاقستان وبلىسى اكىمىنىڭ ءبىرىنشى ورىنباسارى نۇرىمبەت ساقتاعانوۆ قاتىستى.

اۋدان اكىمى سەرىك ءزاينۋلديننىڭ ايتۋىنشا، بيىلعى جىلعا رەسپۋبليكالىق بيۋدجەت ەسەبىنەن قارابۇتا، ماقانشى، قاراتۇما اۋىلدارىنداعى سۋ قۇبىرىن جاڭارتۋ جۇمىستارىنا 927،9 ملن تەڭگە، وبلىستىق بيۋدجەتتەن 92،9 ملن تەڭگە كولەمىندە قارجى بولىنگەن.

«بۇگىنگى تاڭدا اۋداننىڭ 50 پايىزى عانا اۋىزسۋمەن قامتاماسىز ەتىلگەن. 2018-2019 جىلدارعا قابانباي، اقجار، جوعارعى ەگىنسۋ، ەلتاي اۋىلدارىنداعى سۋ قۇبىرى قۇرىلىستارىنىڭ جوبالىق-سمەتالىق قۇجاتتارىن ازىرلەۋگە وبلىستىق بيۋدجەتتەن 34 ملن تەڭگە كولەمىندە قارجى ءبولىندى. وسىلايشا اۋدانداعى ەلدى مەكەندەردى تازا اۋىزسۋمەن 2020 جىلعا دەيىن 85 پايىز قامتاماسىز ەتەمىز»، - دەدى اۋدان باسشىسى.

ونىڭ سوزىنە قاراعاندا،  اعىمداعى جىلى اۋدان ورتالىعىندا 25 مەترلىك ءجۇزۋ باسسەينى مەن «نۇرلى جەر» تۇرعىن ءۇي باعدارلاماسى اياسىندا 30 پاتەرلى تۇرعىن ۇي قۇرىلىسىن سالۋ جوسپارلانىپ وتىر. بۇدان بولەك، الاكول جاعالاۋىن اباتتاندىرۋ جۇمىستارى جالعاسىپ، قابانباي اۋىلىنداعى مادەنيەت ءۇيىنىڭ عيماراتىن اعىمدى جوندەۋ جۇمىستارىنا قاراجات بولىنەدى. وندا تاريحي-ارحەولوگيالىق مۇراجاي اشۋ باعىتىندا جۇمىستار جۇرگىزىلەدى.

ايتا كەتەرلىگى، قازاقستان رەسپۋبليكاسى پرەزيدەنتىنىڭ 2005 جىلعى 6 ساۋىردەگى "جەرگىلىكتى اتقارۋشى ورگاندار باسشىلارىنىڭ حالىققا ەسەپ بەرۋ كەزدەسۋلەرىن وتكىزۋ تۋرالى" جارلىعىنا سايكەس بارلىق دەڭگەيدەگى اكىمدەر جىل سايىن قاڭتار-اقپان ايلارىندا اۋدان، اۋىل تۇرعىندارى الدىندا ەسەپ بەرىپ كەلدى. اكىمدەردىڭ ەسەپ بەرۋى - اتقارۋشى ورگانداردىڭ حالىقتىڭ الدىنداعى جاۋاپكەرشىلىگى مەن ەسەپتىلىگىن ارتتىرۋعا قول جەتكىزۋدىڭ حالىقتى مەملەكەتتىك باسقارۋ پروسەسىن كەڭىنەن تاراتۋدىڭ بىردەن-بىر جولى.