وڭتۇستىك قازاقستان وبلىسىندا حالقى تىعىز ورنالاسقان ماقتارال مەن سارىاعاش اۋداندارىن ءبولۋ ۇسىنىلدى. بۇل ماسەلە بۇگىن وبلىستىق ءماسليحاتتىڭ كەزەكتى وتىرىسىندا تالقىعا ءتۇستى، دەپ حابارلايدى  Qamshy.kz اقپارات اگەنتتىگى قازاقپاراتقا سىلتەمە جاساپ.

وبلىس اكىمىنىڭ باسپا ءسوز حاتشىسى بەيسەن تاجىبايەۆتىڭ مالىمەتىنشە،  قانشاما جىلدان بەرى ايتىلىپ كەلە جاتقان  اۋدانداردى ءبولۋ ماسەلەسىندە سەڭ قوزعالدى. «وقو ءماسليxاتىنىڭ كەزەكتەن تىس حح سەسسياسىندا قارالعان ۇسىنىستى دەپۋتاتتاردىڭ بارلىعى ەرەكشە ىقىلاسپەن قولدادى.

ەندى سۋى شيپالى ءوڭىردى سارىاعاش جانە كەلەس، ال ماقتالى ايماقتى ماقتاارال، اسىقاتا، جەتىساي اۋداندارى دەپ قايتا قۇرۋ ۇسىنىلىپ وتىر. ارينە، ەلباسىنىڭ جارلىعى شىققاننان كەيىن عانا رەسمي تۇردە بولىنگەنىن ايتا الامىز»،-دەيدى بەيسەن تاجىبايەۆ.

1997 جىلى 24 ساۋىردە سول ۋاقىتتىڭ تالابىنا ساي بىرىكتىرىلگەن اۋدانداردىڭ ەندى ءوز الدىنا جەكە شىعۋى زاماننىڭ سۇرانىسىنا وراي جۇزەگە اسۋدا. «بۇگىندە ماقتاارال اۋدانىندا  304 مىڭنان اسا، ال  سارىاعاش اۋدانىندا  327 مىڭنان اسا  ادام تۇرادى. ەكى اۋدان دا  وزبەكستاننىڭ 10 اۋدانىمەن شەكتەسەدى.

ايتپاقشى، "ماقتاارال" اتاۋىنداعى قالىپ كەتكەن "ا" وسى جولى قوسىلىپ، ولقىلىقتىڭ ورنى تولعانىنا دا توقتالماي كەتۋگە بولماس. سونىمەن، ءساتىن سالسا وڭتۇستىكتەگى اۋدان-قالالاردىڭ سانى 18-گە جەتكەلى تۇر»، - دەپ ءتۇيدى ءسوزىن وبلىس اكىمىنىڭ باسپا ءسوز حاتشىسى.