سولتۇستىك قازاقستان وبلىسىندا كامەلەتكە تولماعان ءۇش بالاسىن جالعىز اسىراپ وتىرعان ەر ازامات قۇلاعالى تۇرعان ءۇيدى پانالاپ وتىر.  جاقسىلىق اسقاروۆتىڭ ءتىپتى ول باسپاناعا  زاڭدى قۇجاتتارى دا جوق ەكەن.  ونىڭ ماسەلەسىن جاقسى بىلەتىن ماعجان جۇمابايەۆ اۋدانىنىڭ شەندىلەرى زاڭدى بەلدەن باسىپ جالعىزباستى اكەنى پاتەر كەزەگىنە قويا المايمىز دەيدى. قويعاننىڭ وزىندە بۇل وتباسىنىڭ قونىس تويىن تويلاۋى ەكىتالاي. اۋدان ورتالىعىندا ون جىلدان بەرى  كەزەكتە تۇرعاندارعا بىردە- ءبىر  پاتەر بەرىلمەپتى. بۇل تۋرالى كتك جاڭالىقتارى حابارلايدى.

جاقسىلىق اسقاروۆ پەن الماگۇل 12 جىل بىرگە تۇرعان. كەلىنشەك 4 جىل بۇرىن ءۇش بالاسىن تاستاپ، وزگە ەركەكتىڭ ەتەگىن ۇستاپ كەتە بارىپتى. انالارى كەنجەلەرىنىڭ ەسىندە جوق، ال ەس ءبىلىپ قالعان ەرەسەگىنىڭ وعان  دەگەن  وكپەسى قارا قازانداي.

-مەن ونى جەك كورىپ قالدىم. ويتكەنى ول مەنى تاستاپ كەتتى. ونىڭ قايتىپ كەلگەنىن قالامايمىن، - دەدى 7 سىنىپ وقۋشىسى گۇلفايرا اسقاروۆا.

وتاعاسى ءقازىر 25 مىڭ تەڭگەگە جالدانىپ جۇمىس ىستەيدى. وزگە جۇمىسقا شىعايىن دەسە، كۇنۇزاق بالالارعا باس كوز بولاتىن ەشكىم جوق. ايەلىن اليمەنتكە بەرگەن ەكەن، قاعاز جۇزىندە ەسەپتەلگەن اقشا ەندى جاردەماقى الۋعا كەدەرگى بولىپ تۇر. بۇل وتباسىنىڭ قازىرگى بار ماسەلەسى – باسپانا.

اسقاروۆتار وتباسى بۇل ۇيگە 7 جىل بۇرىن قونىستانعان ەكەن. بالالارىن مەكتەپكە بەرۋگە اسىققان ولار ءۇيدىڭ ەسكى قۇجاتتارىنا دا نازار اۋدارماي، قولحاتپەن عانا ساتىپ العان. ەندى اپاتتى دەپ تانىلعان باسپانانىڭ قۇجاتتارىن رەتكە كەلتىرۋگە ەسكى يەسىنىڭ قۇلقى جوق، ال جاڭا يەسىنىڭ اقشاسى جوق. 

سوندىقتان جاقسىلىق  جالعىز باسپاناسى اپاتتى دەپ تانىلعان جان رەتىندە دە  پاتەر كەزەگىنە تۇرا المايدى. ال تەپسە تەمىر ۇزەتىن ازاماتتىڭ جالعىزباستى اكە رەتىندە ءۇي الۋعا  مۇمكىندىگى  جوق ەكەن.

جاقسىلىقتىڭ جاعدايىن اۋدان شەندىرلەرى جاقسى بىلەدى. ءبىراق زاڭدى بەلشەدەن باسىپ، ونى باسپانا كەزەگىنە قويا المايمىز دەيدى.

-  ول ەشقانداي كاتەگوريا بويىنشا باسپانا كەزەگىنە تۇرا المايدى. قۇجات بويىنشا ونىڭ موينىندا ەشقانداي باسپانا جوق.  جالعىزباستى اكە دەپ تە تانىلماعان. ونىڭ جۇبايى انالىق قۇقىعىنان ايرىلماعان. وسى تۇيتكىلدەردى رەتتەگەن سوڭ عانا ءبىز ونى ءۇي كەزەگىنە قويا الامىز، - ماعجان جۇمابايەۆ اۋداندىق تۇكش ءبولىمىنىڭ باسشىسى سەرىك قوسانوۆ.

قۇجاتتارىن رەتتەگەننىڭ  وزىندە بۇل وتباسىنىڭ  جۋىق ارادا قونىس تويىن تويلاۋى ەكىتالاي. ون جىل بۇرىن  اۋداندىق اكىمدىكتە تۇزىلگەن باسپانا كەزەگى وسى جىلدارى بىردە-بىر ادامعا ىلگەرى جىلجىماپتى.