تالدىقورعان مەديسينالىق كوللەدجىندە قوعامدىق دەنساۋلىق ساقتاۋ سالاسىنىڭ ماماندارىن دايىنداۋداعى وزەكتى ماسەلەلەر مەن كەلەشەك دامۋى تالقىعا ءتۇستى، دەپ جازادى Qamshy.kz اقپارات اگەنتتىگى.
بۇل شاراعا مەديسينالىق جوو-لاردىڭ جەتەكشى عالىمدارى مەن وقىتۋشىلارى، دارىگەرلەر، قوعامدىق دەنساۋلىق ساقتاۋ دەپارتامەنتى مەن وڭىرلىك كاسىپكەرلەر پالاتاسىنىڭ ماماندارى قاتىسىپ، ۇسىنىس-پىكىرلەرىن ورتاعا سالدى.
كوللەدج وكىلدەرىنىڭ ايتۋىنشا، «گيگيەنا جانە ەپيدەميولوگيا» ماماندىعى بويىنشا ءبىلىم بەرۋ باعدارلاماسى ەسكىرگەن جانە جۇمىس بەرۋشىلەردىڭ تالاپتارىنا سايكەس كەلمەيدى ەكەن.
«دەنساۋلىق ساقتاۋ جۇيەسىندە پروفيلاكتيكالىق مەديسينانىڭ ۇستانىمىن تاجىريبەدە ىسكە اسىراتىن قوعامدىق دەنساۋلىقتى قورعاۋ سالاسىنىڭ ورنى ەرەكشە. «گيگيەنا جانە ەپيدەميولوگيا» ماماندىعى بويىنشا بەكىتىلگەن مەملەكەتتىك جالپىعا مىندەتتى ءبىلىم بەرۋ ستاندارتى زامان تالابى مەن ونىڭ شارتتارىنا جاۋاپ بەرمەيدى. پراكتيكادا جۇمىس بەرۋشىلەر تۇلەكتەردەن مۇلدەم باسقا مىندەتتەر تالاپ ەتەدى»، - دەپ ايتىپ ءوتتى تالدىقورعان مەديسينالىق كوللەدجىنىڭ ديرەكتورى سەرىك جانسەڭگىروۆ.
س.اسفەندياروۆ اتىنداعى قازاق ۇمۋ پروفەسسورى ساكەن امىرەيەۆتىڭ ايتۋىنشا، مامان دايىنداۋ ماسەلەسىن رەسپۋبليكالىق دەڭگەيگە كوتەرىپ، ءبىلىم بەرۋ ستاندارتتارىنا قاجەتتى وزگەرتۋلەر ەنگىزۋ كەرەك.
«بارلىق سالالار مەن باعىتتار بويىنشا دامۋ مەن جاڭعىرتۋ ءجۇرىپ جاتىر. ءبىز ءبىر ورىندا قالىپ قالعان سياقتىمىز. ماماندىق بويىنشا ستۋدەنتتەر تەستىلەۋدى وتە المايدى. سەبەبى، باعدارلامادا كوپتەگەن تاقىرىپتار قامتىلماعان. مىسالى، شەت ەلدەردە وسى ماماندىق بار بولعانىمەن باسقاشا اتالادى. بۇگىنگى كوتەرىپ وتىرعان سۇراقتى كەڭ كولەمدە تالقىلاپ، ياعني جوعارى وقۋ ورنىمەن بىرىگىپ ورتاق مامىلەگە كەلۋ كەرەك»، - دەيدى ساكەن امىرەيەۆ.
وسىعان بايلانىستى «گيگيەنا جانە ەپيدەميولوگيا» ماماندىعى بويىنشا تۇلەكتەر اراسىندا جۇمىسقا ورنالاسۋ دەڭگەيى تومەن. سونىمەن بىرگە، اتالمىش شارادا ساراپشىلار قورىتىندى اتتەستاسيالاۋدى ەكى كەزەڭ بويىنشا وتكىزۋدى جانە ەلەكتيۆتى پاندەردىڭ كاتالوگىن ەنگىۋدى ۇسىندى.
ءوز كەزەگىندە، الماتى وبلىسى كاسىپكەرلەر پالاتاسىنىڭ ساراپشىسى ارداق قاشقاروۆا ءدۋالدى وقىتۋدى ەنگىزۋ ماسەلەنى شەشۋدىڭ ءبىر سەبەبى بولىپ تابىلاتىن ايتىپ ءوتتى.
«ءدۋالدى جۇيە وقىتۋ ۇردىسىندە تەوريالىق جانە پراكتيكالىق دايىندىقتى بىرىكتىرە الادى. وقۋ باعدارلاماسى جۇمىس بەرۋشىنىڭ تاپسىرىسىمەن جانە تىكەلەي قاتىسۋىمەن ازىرلەنىپ، ءبىر ماماندىق بويىنشا وقۋ ماتەريالدارىنىڭ كولەمىن ءپان بويىنشا بولۋگە مۇمكىندىك بەرەدى. وسىلايشا، ءدۋالدى وقىتۋ جۇيەسىن دامىتۋدىڭ جول كارتاسى اياسىندا وقۋ باعدارلاماسىنا وزگەرتۋ ەنگىزە الاسىزدار»، - دەدى ارداق قاشقاروۆا.
ساراپشى اتالمىش ماسەلە بويىنشا وڭىرلەردىڭ پىكىرىن ەسكەرۋ ماڭىزدىلىعىن اتاپ ءوتتى.
تالقىلاۋ قورىتىندىسى بويىنشا، مەديسينالىق كوللەدج الداعى ۋاقىتتا الماتى وبلىسىنىڭ ءدۋالدى وقىتۋدى دامىتۋدىڭ جول كارتاسىنا ەنۋ مەن مەملەكەتتىك جالپىعا مىندەتتى ءبىلىم بەرۋ ستاندارتىنا ءبىرقاتار وزگەرتۋلەر ەنگىزۋدى جوسپارلاپ وتىر.
ەسكە سالساق، تالدىقورعان مەديسينالىق كوللەدجىنىڭ 80 جىلدىق تاريحى بار. بۇگىنگى تاڭدا وقۋ ورنى سەگىز ماماندىق بويىنشا كادر دايىندايدى.
