وزبەكستان ازاماتتارى مىنگەن اۆتوبۋس حرومتاۋ اۋدانىنا قاراستى جازىق اۋىلى ماڭىندا اۋدارىلدى. «مەرسەدەس» ماركالى كولىكتە جۇرگىزۋشىمەن قوسقاندا 25 ادام بولعان. ابىروي بولعاندا، جولاۋشىلاردىڭ ءبارى امان، تەك جەتەۋى اۋرۋحانادا ەم الىپ جاتىر. بۇل تۋرالى كتك جاڭالىقتارى حابارلادى.
اۆتوبۋستى جۇرگىزگەن وقو-نىڭ 25 جاستاعى تۇرعىنى بولىپ شىقتى. جول اپاتىنا بايلانىستى قىلمىستىق ءىس قوزعالدى.
2018 جىلدان بەرى اقتوبە وبلىسىندا وزبەك جولاۋشىلارى وتىرعان ەكىنشى اۆتوبۋس اپاتقا ۇشىراپ وتىر. ءبىر ايدان اسا ۋاقىت بۇرىن رەسەيگە بەت العان جولاۋشىلار كولىگىندە وزبەكستاننىڭ 52 ازاماتى تىرىدەي جانىپ كەتكەن ەدى. امان قالعان اۆتوبۋس جۇرگىزۋشىسى مەن ەكى كومەكشىسىنە قاتىستى تەرگەۋ جۇمىستارى ءجۇرىپ جاتىر.
