ەلباسى ەل ەرتەڭىنە ەلەڭدەپ، مينيسترلەردى جەكە قابىلداپ جاتىر. ولاردى پرەزيدەنت كابينەتىنە كىرەردە، سيقىرشى اتاي «سۋف!» دەپ كىشكەنتاي ءبىر–ەكى جاسار بالا ەتىپ جىبەرەدى. شىعاردا «ۋف!»دەپ تۇكىرىپ، قازىرگى مينيستر قالپىنا كەلتىرە قويادى ەكەن. 
ەلباسى كابينەتىنە «جاعىمپاز» ءمينيسترى كىردى، كىشكەنتاي بالاقاي بولىپ. ءبىراق وزىنە شاق كوستىم–شالبار كيگەن، موينىندا گالستۋگى بار دەگەندەي...
–بالاقاي مينيستر، قازاقشا سويلەي الاسىڭ با؟
–شولەيمىن.
–حالىق دەشى؟
–عالىق.
–حا–لىق؟
–عا–لىق.
–ءبىز قازاقستاندا تۇرامىز. مەملەكەتتىك ءتىل–قازاق ءتىلى. ۇكىمەت تە، پارلامەنت تە قازاقشا سويلەۋى كەرەك. سولا ما بالاقاي؟
–شولاي، وتە دۇيىش ايتاسىز، مەنىڭ ويىم دا شولاي...
–ءما، قازاقشا ءتىلىڭ شىعىپ كەلە جاتىر ەكەن، كامپيت جەي عوي! –دەگەن ەلباسى ءيىلىپ، باسىن شۇلعي بەرگەن بالاقاي مينيسترگە شوكولاد بەردى. كەلەسى «قازاق كرەسلوسى» ءمينيسترى كابينەتكە كىرە سالىپ، «بيپ–بيپ، بۋم–بۋم، ۆووووم!» دەپ كىشكەنتاي ماشيناسىمەن ويناي باستاپ ەدى، ەلباسى ونى كوتەرىپ الدى.
–اتىڭ كىم سەنىڭ؟
–باستىق.
–فاميلياڭ؟
–جاستىق.
–قازاقشا ءتىلىڭ جاقسى شىعىپتى عوي، نەگە قازاقپەن قازاقشا سويلەسپەيسىڭ؟
–كوز ءتيىپ كەتەدى مە دەپ... كەشىرىڭىز، تۇكىرىپ قويىڭىزشى؟
پرەزيدەنت مينيسترگە تۇكىرىپ، تاڭدايىن كوتەرىپ قويدى. تاعى ءبىر بالاقاي مينيستر كەلدى. 
–سەنىڭ ءتىلىڭ اعىلشىنشا شىققان دەيدى. ءحالىڭ قالاي؟
–وكەي.
–ۇكىمەتتە بايانداماڭدى قازاقشا جاسا، جاراي ما؟
–وكەي...
–اتىڭ كىم؟
–وكەي.
–وكەي ەمەس، ءتىلىڭ كەلمەي تۇر عوي، الكەي، الكەيسىڭ سەن. سامسا جەيسىڭ بە؟
–وكەي.
پرەزيدەنت سامسانى ۇسىنا بەرىپ، قولىن تارتىپ قالدى.
–جوق، سەن الدىمەن قازاقشا سويلەۋدى ۇيرەنىپ كەل، سوسىن جەيسىڭ سامسانى...
–ءو–ءوو، كاتىنىم كاشتىىى.. –دەپ جىلادى مينيستر.
–قاتىنىم قاشقانى نەسى؟ –دەپ سۇرادى پرەزيدەنت.
–سامسا بەيىڭىزشى، كاتىنىم كاشتىىى...
–ا، قارنىم اشتى دەيسىڭ بە، بالاقاي؟ بار، قازاقشا ۇيرەنىپ كەلە عوي! ساعان سينحروندى اۋدارما كەرەك ەمەس، قۇقىڭ تاپتالاتىنداي. قازاقتىڭ قارا دومالاق بالاسى ەكەنسىڭ...
مينيستر بالاقاي كابينەتتەن جىلاپ شىقتى، «بۇرىنعى قالپىما كەلتىرىڭىزشى؟» دەپ سيقىرشىدان سۇراپ شىقتى. قۇدايىم–اي، ەلباسى ايتپاي ءجۇر ەكەن دە، كەيبىر مينيسترلەر مەن دەپۋتاتتار، سەناتورلار قازاقشا ۇيرەنۋ ءۇشىن قازاق بالا–باقشالارىنا بارىپ ءجۇردى. جاسا، قازاق ءتىلى! ۋرا، ۇكىمەتتىڭ ءتىلى شىقتى!