5 قاڭتاردان بەرى استانا قالاسىنداعى تەرگەۋ يزولياتورلارىنىڭ بىرىندە قاماۋدا وتىرعان كارا وزان كادير ەسىمدى تۇرىك ازاماتىنىڭ ادۆوكاتى يۋليا شاكير تۇركيانىڭ قازاقستانداعى ەلشىلىگىنە اشۋلى ەكەنىن ءبىلدىردى، دەپ جازادى Qamshy.kz اقپارات اگەنتتىگى Kazaknews.kz سايتىنا سىلتەمە جاساي وتىرىپ.

Kazakistan.kz اقپارات اگەنتتىگىنىڭ تىلشىلەرىمەن كەزدەسكەن يۋليا شاكير قورعالۋشىسىنىڭ ءىسىن 18 قاڭتاردان بەرى جۇرگىزىپ كەلە جاتقانىن ايتتى. ەرەجەلەرگە سايكەس بۇل سوت ءىسى جايىندا مالىمەت بەرە المايتىنىن جەتكىزگەن يۋ.شاكير تەرگەۋ جۇمىستارىنىڭ ءادىل جۇرگىزىلۋى ءۇشىن كوپتەگەن ينستانسيالارعا جۇگىنىپ، ابدەن تابان توزدىرعانىن جەتكىزدى.

ك.و.كاديردىڭ قۇقىعىن قورعاۋ نيەتىمەن بىردەن تۇركيا ەلشىلىگىنە حابار بەرگەن ادۆوكات تۇرىك ديپلوماتيالىق وكىلدىگى تاراپىنان تۇركيا ازاماتىنا قاندايدا ءبىر كومەك كورسەتىلەدى دەپ كۇتكەن. قورعاۋشىنىڭ ايتۋىنشا، ءوز پراكتيكاسىندا شەتەل ازاماتتارى ءىستى بولعاندا سول ەلدىڭ ەلشىلىكتەرى بارلىق پروسەسكە بەلسەنە قاتىسىپ، قورعالۋشىلارىنا باستان اياق قولداۋ كورسەتەدى. ال تۇرىك ەلشىلىگى ءىستى بولعان وتانداستارىنا نەمقۇرايلى قاراپ كەلەدى.

ك.و.كاديردىڭ ءىسىن قولعا العالى يۋليا شاكير ەلشىلىككە قوڭىراۋ شالۋىن ۇدەتىپ دامىل بەرمەسە دە، استاناداعى كونسۋلدىق بىلق ەتپەگەن. ەلشىلىك وكىلدەرى ادۆوكاتتىڭ ماسەلەگە قاتىستى حاتىن قابىلداماي، ابدەن الەك قىلعان. يۋ.شاكير ۇزىن سونار قوڭىراۋلاردان كەيىن بارىپ ەلشىلىككە حاتىن تابىستاعان، ونىڭ وزىندە دە تۇركيانىڭ قازاقستانداعى ەلشىلىگى حاتتىڭ كىرىس ءنومىرىن بەرمەگەن، ياعني حاتتى تىركەۋگە الماعان.

-تۇرىك ەلشىمەن كەزدەسە الماعان ادۆوكات تۇركيا سىرتقى ىستەر مينيسترلىگىنە دە حات جازعان

تۇرىك ەلشىسى نيەۆزات ۋيانىكپەن كەزدەسكىسى كەلگەنىن مالىمدەگەن ك.و.كاديردىڭ ادۆوكاتى بۇل باستاماسىنىڭ دا جاۋاپسىز قالعانىن ايتادى. ەلشىلىك وكىلدەرى ادۆوكاتتىڭ اۋزىن قۋ شوپپەن سۇرتكەن: ن.ۋيانىك بىردە بوس ەمەس بولسا، بىردە جۇمىس ورنىنان تابىلماعان.

يۋليا شاكير، سونىمەن قاتار، تۇركيانىڭ سىرتقى ىستەر مينيسترلىگىنە رەسمي فەيسبۋك پاراقشاسى ارقىلى حات جازعان. قىرسىققاندا ولار دا جىم-جىرت.

-تۇرىك ەلشىلىگى قازاقستانعا نوتا جىبەرمەك بولعان..

يۋليا شاكير اقپان ايىنىڭ ورتا كەزىندە تۇرىك ەلشىلىگىنەن ءوزىن «سەكرەتارمىن» دەپ تانىستىرعان بىرەۋ حابارلاسىپ، ك.و.كاديردىڭ ىسىنەن ەلشىلىكتىڭ حابارى بار ەكەنىن مالىمدەي كەلە، قازاقستان سىرتقى ىستەر مينيسترلىگىنە ءتيىستى نوتا جىبەرىلەدى دەپ سەندىرگەن. ادۆوكاتتىڭ توپشىلاۋىنشا، ديپلوماتيالىق نوتانىن جىبەرىلىپ جىبەرىلمەگەنىن تەكسەرۋ تۇرىك ەلشىلىگىنەن حابار الىنباۋىنا بايلانىستى مۇمكىن ەمەس.

-كارا وزان كاديردى قاماققا العان تەرگەۋشى ىستەن شەتتەتىلدى

استانا ادۆوكاتتار كوللەگياسىنىڭ مۇشەسى يۋليا شاكير كارا وزان كاديردىڭ ىسىندە ىلگەرىلەۋدىڭ بولعانىن ايتادى. يۋ.شاكيردىڭ ايتۋىنشا، تەرگەۋ جۇمىسىن جۇرگىزگەن تەرگەۋشى قىلمىستىق ءىستى اشاردا زاڭسىز ارەكەتتەرگە بارعان. وسى جايتتار اشىققا شىعىپ، ادىلدىكتەن اتتاعانى بەلگىلى بولعان تەرگەۋشى بۇل ىستەن شەتتەتىلگەن. يۋ.شاكيردىڭ پايىمداۋىنشا، مىندەتىن جاۋاپسىز اتقارعان وسى تەرگەۋشىنىڭ كەسىرىنەن قورعالۋشىسى وسى ۋاقىتقا شەيىن تۇتقىندا وتىر.

-يزولياتوردا وتىرعان كارا وزان كادير الەۋمەتتىك وقشاۋلاۋدا

يۋليا شاكير ەكى اي بويى تەرگەۋ يزولياتورىندا وتىرعان قورعالۋشىسىنىڭ حال-جاعدايى تۋرالى دا اڭگىمەلەپ بەردى. يۋ.شاكيردىڭ ايتۋىنشا، كارا وزان كادير وڭاشا كامەرادا ەمەس، يزولياتوردا كوپشىلىكپەن بىرگە وتىرسا دا، قازاق نەمەسە ورىس تىلدەرىن بىلمەۋىنە بايلانىستى وقشاۋلاۋدا. جانىنداعى ايىپتالۋشىلار مەن باقىلاۋشى قىزمەتكەرلەرمەن ىم-يشارامەن عانا تۇسىنىسەدى. مىسالعا، يۋ.شاكير وسى ءىستى قابىلداعان كەزدە قورعالۋشىسى تۇماۋراتىپ اۋىرعان، الايدا تىلدىك كەدەرگىنىڭ كەسىرىنەن مەديسينالىق كومەك قابىلداي الماعان. ادۆوكات بۇل جايتتى دا ەلشىلىككە جەتكىزگەنىن، ءبىراق ولاردىڭ سەلسوق قاراعانىن ايتىپ ناليدى. اقىرىندا ك.و.كاديرگە ەم-دوم شارالارىنىڭ كورسەتىلۋىنە قورعاۋشىلارى تۇرتكى بولعان.

تۇرىك ازاماتى وسى ۋاقىتقا شەيىن ادۆوكاتتار مەن اۋدارماشىدان باسقا ەشكىممەن كەزدەسپەگەن. جاقىندارى مەن تۋىستارى تۇركيادا، ال اۋىر قىلمىس بويىنشا ايىپتالۋىنا بايلانىستى وزگە ازاماتتارمەن كەزدەسۋىنە ءتيىستى پارمەنسىز رۇقسات ەتىلمەيدى. زاڭ بويىنشا، ديپلوماتيالىق پاسپورت يەلەرىنىڭ ايىپتالۋشىمەن جۇزدەسۋىنە بولادى. الايدا، جوعارىدا ايتىلعانداي، ەلشىلىك قىزمەتكەرلەرى وتانداستارىنىڭ قال-جاعدايىن بىلۋگە باس سۇقپاعان.

ك.و.كاديردىڭ ادۆوكاتى ءسوزىنىڭ سوڭىندا سوت ءىسىن جۇرگىزۋشى تەرگەۋشىنىڭ ادىلەتسىزدىگى مەن تۇرىك ەلشىلىگىنىڭ نەمقۇرايلىلىعىنىڭ اراسىندا ورتادا قالعانىن مالىمدەدى. يۋ.شاكير قورعالۋشىسىنىڭ اقتالۋىن جەدەلدەتۋ ءۇشىن شاراسىزدىقتان ەلباسى نۇرسۇلتان ءابىشۇلىنا حات جازعانىن جەتكىزدى.