ق ر مادەنيەت جانە سپورت ءمينيسترى ارىستانبەك مۇحامەدي ۇلى ناۋرىز مەيرامىن جاڭا ۇلگىدە تويلاۋ جونىندە «ەگەمەن قازاقستان» گازەتىنە سۇحبات بەرگەن بولاتىن. مينيستر ناۋرىزعا قاجەت ىرگەلى ىزدەنىستەرگە توقتالىپ، وتكىزىلۋگە ءتيىس تاريحي ءارى زاماناۋي شارالاردى بىرنەشە تارماققا ءبولىپ كورسەتكەن ەدى. بۇل ۇسىنىسقا ەلىمىزدەگى قوعام قايراتكەرلەرى ءۇن قوسىپ جاتىر.
ەرماحان ىبىرايىم ۇلى، بوكستان وليمپيادالىق دايارلاۋ ورتالىعىنىڭ ديرەكتورى:
- ناۋرىز مەرەكەسى قازاق حالقى ءۇشىن وتە كيەلى سانالادى. تابيعاتتىڭ ءتىرىلىپ، جاڭا جىلدىڭ باستالاتىن ۋاقىتى. ناۋرىز مەرەكەسى ەلىمىزدە كەڭ كولەمدە اتالىپ وتىلەدى. كەڭەس وداعى كەزىندە ۇمىتىلا باستاعان مەيرامىمىزدى ەلباسى نۇرسۇلتان ءابىش ۇلى جانداندىردى. وسى ورايدا قازاقستان رەسپۋبليكاسىنىڭ مادەنيەت جانە سپورت ءمينيسترى ارىستانبەك مۇحامەدي ۇلىنىڭ ناۋرىز مەيرامىنا قاتىستى جاقىندا عانا ەگەمەن قازاقستان گازەتىنە بەرگەن ماقالاسىنداعى ايتقان پىكىرىنە تولىقتاي قوسىلامىن. مينيستر ناۋرىزدى تويلاۋدى ناۋرىز ايىنىڭ باسىنان باستاۋ كەرەك دەگەن جاقسى وي تاستادى. ونى الماتى قالاسى قولداپ اكەتتى. وسىلايشا، باسقا دا وڭىرلەرگە كەزەك بەرىلەدى. سونىمەن قاتار، ناۋرىزدى جەرگىلىكتى جەردىڭ مەيرامى رەتىندەگى پوزيسياسىن كەڭەيتۋ قاجەت دەگەن ويى دا ماعان ۇنادى. بۇل بىرىنشىدەن، تۇركى الەمىنە ورتاق مەيرامدى ءبىر اتانىڭ بالالارىنداي تويلاۋ بولسا، ەكىنشىدەن، ەلىمىزدى باتىس الەمىنە باسقا قىرىمىزدان تانىتۋ. ناۋرىز مەيرامىن ۇمىتپاي، ونى تاۋەلسىزدىك كۇنىنەن كەيىنگى تاعى ءبىر باستى مەرەكە ەتۋ قاجەت سەكىلدى.
نۇرجان جانپەيىسوۆ، ت. جۇرگەنوۆ اتىنداعى ءقازۇوا-نىڭ «ءداستۇرلى مۋزىكالىق ونەر» كافەدراسىنىڭ ۇستازى:
- باۋىرساق، ناۋرىز كوجە مەن پالاۋدى تەگىن تاراتۋ كەرەك. سوڭعى جىلدارى ول جۇرتتىڭ بيزنەسىنە اينالىپ كەتتى. بالالارعا بارىنشا، بىرنەشە جەردەن ونەرلەرىن كورسەتۋگە مۇمكىندىك جاساۋ كەرەك. ءبىر الاڭنىڭ وزىندە بىرنەشە جەردەن ۇيىمداستىرىپ جانە ولارعا جەڭىل-جەلپى سىيلىقتار بەرۋگەن دۇرىس. قىمبات قاجەت ەمەس، بيىل قىمبات بەرسەڭ ەندىگى، ونىڭ ارعى جىلى دا سولاي ىستەۋگە تۋرا كەلەدى. سوندىقتان ارزان جانە بارىنە جەتەتىندەي بولعانى ءجون. سوندا بالالار قىزىعا تۇسەدى. ورىستار، تب وزگە ۇلت وكىلدەرى دە بارۋ ىنتالانۋ ءۇشىن بارلىق ادامعا قىزىقتى ءارى پايدالى، ۇيرەنەتىن جانە ولجالى قايتاتىنداي وتكىزگەن ابزال. برازيليا، ت.ب. ەلدەردىڭ كارناۆالى سياقتى كوشەدەن سىرنايلاتىپ-كەرنەيلەتىپ، كوڭىلدى مۋزىكامەن قاراپ تۇرعان ادامداردىڭ ءوزى بيلەپ، قوسىلىپ ەرە كەتەتىندەي شەرۋ وتكەنى دە جاقسى بولار ەدى، ۇيدە وتىرعان ادامنىڭ ءوزى ەستىپ ءدۇر سىلكىنەتىندەي. جەكە ادامدار قولونەر بۇيىمدارىن الىپ شىعىپ ساتىپ جاتسا يگى بولار ەدى. بۇل ءۇردىس جاستارعا دا، ۇلكەندەرگە دە كەز كەلگەن كوشەدە وتىرىپ تىنىستاۋىنا جانە سونىمەن قاتار ناۋرىز مەرەكەسىن كورىپ، سەزىپ وتىرۋعا قول جەتىمدى مۇمكىندىك تۋعىزىلسا نۇر ۇستىنە نۇر بولار ەدى.
