بۇگىن قازاق تەليەۆيزياسىنا 60 جىل تولىپ وتىر. بۇل تۋرالى «قازاقستان» رترك» اق-نىڭ باسقارما ءتوراعاسى ەرلان قارين فەيسبۋكتەگى پاراقشاسىندا جازدى، دەپ حابارلايدى Qamshy.kz اقپارات اگەنتتىگى.

"قۇرمەتتى دوستار! بۇگىن قازاق تەليەۆيزياسى ءۇشىن ايتۋلى كۇن! وسىدان 60 جىل بۇرىن قازاق تەلەديدارىنىڭ نەگىزى قالانىپ، العاشقى وتاندىق حابارلار ەفيرگە شىعا باستادى. 1958 جىلى 8 ناۋرىزدا العاشقى رەت ەفير تەستىلى تۇردە تاراتىلدى، ال 16 ناۋرىزدا ەفير تۇراقتى تۇردە تاراتىلا باستادى. قازاق تەليەۆيزياسى 60 جىلدىق دامۋ تاريxىندا حالقىمىزدىڭ رۋحاني، مادەني، قوعامدىق قۇندىلىقتارىنىڭ دامۋىنا، ۇلتتىق سانا سەزىمنىڭ قالىپتاسۋىنا قوسقان ۇلەسى ولشەۋسىز، ماڭىزى ەرەكشە. ءار قازاقتىڭ تورىنەن ورىن العان كوگىلدىر ەكراننان سان ءتۇرلى قۇندى دۇنيەلەر جارىق كورىپ، قالىڭ كورەرمەنگە جول تارتتى. 

قازاق تەليەۆيزياسى – قازاق زيالى قاۋىمىنىڭ رۋحاني، مادەني وشاعى بولدى. وسى قارا شاڭىراقتا ءار جىلدارى ەڭبەك ەتكەن زيالى قاۋىم كوپتەگەن جاس مامانداردى تاربيەلەپ، بولاشاققا باعىت بەردى، جول سىلتەدى، وتاندىق تەليەۆيزيا مەكتەبىنىڭ قالىپتاسۋىنا اتسالىستى. ۇلتتىق ارنا ءار كەزەڭدە زامان اعىمىنا ساي وزگەرىپ، بولاشاققا قانات قاعىپ كەلەدى. 

ءبىز ادەتتەگىدەي، «التىن قوردا» ساقتالعان تەلەباعدارلامالار مەن تەليەۆيزيا ارداگەرلەرى جايلى باعدارلامالاردى كورسەتۋدى جالعاستىرامىز.

اتاپ ايتساق: 7 ناۋرىزدا، 17:35-تە بەلگىلى كۇيشى جانە تەرمەشى، قازاق تەلەديدارىنىڭ رەجيسسەرى مۇرات كاريمۋللين جايلى «جارقىن بەينە»، 8 ناۋرىزدا، 17:05-تە قازاقتىڭ العاشقى ديكتورى زۇلقيا جۇماتوۆا جايلى «كەلبەت»، 10 ناۋرىزدا، 08:20-دا جانە 11 ناۋرىز، 11:25-تە قازاق تەليەۆيزياسىنىڭ ارداگەرلەرى قاتىسقان «دارا جول»، 10 ناۋرىز، 16:35-تە قازاق تەليەۆيزياسىنىڭ 60 جىلدىعىنا ارنالعان ارنايى حابار، ال 11 ناۋرىزدا، 17:25-تە بەلگىلى جۋرناليست بەيبىت قۇسانبەكتىڭ «ومىر-وزەن» باعدارلامالارىن تاماشالاي الاسىزدار! 

كەشەگى كۇن - بۇگىنگى تاريح دەمەكشى، كەزىندە ەل مۇددەسى ءۇشىن اتسالىسقان ارداگەرلەرىمىزدى ۇمىتپاۋ – ءبىزدىڭ پارىزىمىز!

ال، 16 ناۋرىزدا «Qazaqstan» ۇلتتىق ارناسى قازاق تەليەۆيزياسىنىڭ 60 جىلدىعىنا وراي، تەليەۆيزيا ارداگەرلەرىنە ارناپ سالتاناتتى جيىن وتكىزەدى. 

الداعى ۋاقىتتا ۇلتتىق ارنانى بۇدان دا بيىك اسۋلار كۇتىپ تۇر. «Qazaqstan» ۇجىمى تالاي بەلەستەردى باعىندىرىپ، ۇلكەن جەتىستىكتەرگە جەتەتىنىنە سەنىمدىمىز! بارشاڭىزدى قازاق تەليەۆيزياسىنىڭ 60 جىلدىق مەرەيتويمەن قۇتتىقتايمىز!" - دەپ جازادى ەرلان قارين.