بريتاندىق باعدارلامالاۋشى، DeepMind كومپانياسىنىڭ نەگىزىن سالعان دەميس حاسسابيس جاساندى ينتەللەكتىگە قاتىستى شەشىلمەگەن ماسەلەلەردىڭ كوپ ەكەنىن ايتادى. 

ول العاشىندا Lionhead ستۋدياسىندا قىزمەت اتقارىپ، كەيىن ءوزىنىڭ تاۋەلسىز ستۋدياسىن جاساپ شىعاردى. 2010 جىلى ءوزىن عىلىمعا ارناپ،  DeepMind كومپانياسىنىڭ نەگىزىن سالدى. بۇگىندە اتالمىش كومپانيا الگوريتمدەردى قۇرۋ بويىنشا الدىڭعى قاتاردا تۇر.

سوڭعى ەكى جىلدا ونىڭ كومپانياسى الەمدىك جاڭالىقتاردان ءجيى كورسەتىلىپ كەلەدى. سەبەبى ءحاسسابيستىڭ AlphaGo  دەپ اتالاتىن جاساندى ينتەللەكتى «گو» لوگيكالىق ويىنىندا كە سزە كاسىبي ويىنشىسىن جەڭگەن بولاتىن.

لوندون ۋنيۆەرسيتەتتىك كوللەدجىندە وتكەن سۇراق-جاۋاپ سەسسياسىندا حاسسابيس جاساندى ينتەللەكتىگە قاتىستى ءالى تالاي ماسەلەلەردى شەشۋ كەرەكتىگىن ايتتى.

«ءبىز جاۋاپ بەرۋگە ءتيىس كۇردەلى فيلوسوفيالىق سۇراقتار ءالى دە كوپ. ماسەلەن، بۇل جۇيەلەردى قالاي باسقارامىز؟ ولار بىزگە نە ءۇشىن قاجەت؟ ولاردى قۇراستىرۋ ءۇشىن ءبىز قانداي قۇندىلىقتاردى قۇربان ەتەمىز؟»، - دەدى دەميس حاسسابيس.

بۇعان قوسا، عالىم جاساندى ينتەللەكتىنىڭ ادامزات ءۇشىن ەڭ ماڭىزدى تەحنولوگيا بولاتىنىن ايت وتىرىپ، ونىڭ ءقاۋىپتى تۇسىنىڭ بارىن دا ەسكەرتتى. «تەك ادامداردىڭ ونى قالاي پايدالاناتىنىنا بايلانىستى. ونىڭ سالدارى قانداي بولاتىنى بەلگىسىز. جاقسى دا، جامان دا بولۋى مۇمكىن»، - دەدى حاسسابيس.

ايتا كەتەيىك، 2014 جىلعى ەلەۋلى جەتىستىكتەردەن كەيىن DeepMind كومپانياسىن Google كورپوراسياسى £400 ميلليونعا ساتىپ العان بولاتىن. قاعاز جۇزىندە ءىرى كونگلومەراتتىڭ ءبىر بولشەگى بولعانىمەن، ءوزىنىڭ تاۋەلسىزدىگىن ساقتاپ قالدى.