ياندەكس.براۋزەر ماينينگ سكريپتتەرىن بىردەن انىقتاپ، بۇعاتتاۋدى ۇيرەندى. ماينينگ سكريپتتەرى – سايتتاردىڭ ىشىنە كىرىپ الىپ، قولدانۋشىلاردىڭ ەسەپتەۋ رەسۋرستارىن كريپتوۆاليۋتا وندىرۋگە استىرتىن پايدالانۋعا مۇمكىندىك بەرەتىن ميني-پروگراممالار. سكريپتى بار سايتتار سىرتتاي ەش كۇمان تۋعىزبايدى، ءبىراق ادام سايتتى قاراپ جاتقان كەزدە ونىڭ كومپيۋتەرى نەمەسە سمارتفونى ماينينگ ەسەپتەۋلەرىنە قولدانىلىپ كەتەدى. سونىڭ سالدارىنان ورتالىق پروسەسسورعا ارتىق جۇك تۇسەدى: قۇرىلعىنىڭ جۇمىسى باياۋلاپ، ەنەرگيانى كوپ شىعىندايدى جانە قىزا باستايدى.

«براۋزەر ارقىلى ماينينگ جاساۋ قولدانۋشى وتىرعان جۇيەگە وتە جاعىمسىز اسەر ەتەدى، - دەيدى دەسكتوپقا ارنالعان ياندەكس.براۋزەر جەتەكشىسى رومان يۆانوۆ. – ماينەرلەر ءار پروسەسسور يادروسى قۋاتىنىڭ ءجۇز پايىزىنا دەيىن جاۋلاپ الا الادى. ونىڭ ۇستىنە، ياندەكس.براۋزەر مىندەتتەمەلەر ديسپەچەرىندە ورتالىق پروسەسسور قۇرىلعىسىنا تۇسەتىن اۋىرلىق 100%-دان اسىپ كەتۋى مۇمكىن، سەبەبى بۇل جاعدايدا ءار يادرو ءۇشىن كورسەتكىشتەر قوسىلعان كۇيدە ەسەپتەلەدى».

ياندەكس.براۋزەر سايتتاردى قاراۋ كەزىندە پروسەسسورعا قانشالىقتى جۇك تۇسكەنىن تالداي الادى. سايتقا سالماقتىڭ كوپ تۇسكەنى – وعان ماينينگ سكريپتى قوسىلۋى مۇمكىن دەگەن دابىل. ەگەر تەكسەرۋ بارىسىندا سكريپت ورناتىلعانى انىقتالسا، براۋزەر ونى بۇعاتتايدى. سايت جۇمىس ىستەي بەرەدى، ءبىراق ماينەرلەر قولدانۋشىلاردىڭ قۇرىلعىسىن ءوز ماقساتىنا پايدالانا المايدى.

ياندەكس.براۋزەر قولدانۋشىلاردى ماينينگتەن قورعاۋدى 2017 جىلدىڭ قاراشاسىندا باستادى. ول كەزدە كوماندا ماينەرلەر قولداناتىن سكريپتتەر ءتىزىمىن جاسادى دا، براۋزەردى ولاردى بۇعاتتاۋعا «ۇيرەتتى». جاڭا سكريپتتەر اپتا سايىن پايدا بولىپ جاتادى، سوندىقتان ءتىزىمدى ۇنەمى تولىقتىرىپ وتىرۋ قاجەت. ەندى براۋزەر بۇل جۇمىستى قولدانۋشىنىڭ ورتالىق پروسەسسورىنا تۇسكەن جۇكتى تالداي وتىرىپ، وزدىگىنەن اتقارادى. بۇل ءتاسىل جاڭادان پايدا بولعان سكريپتتەرگە مەيلىنشە جىلدام ارەكەت ەتۋگە مۇمكىندىك بەرەدى.

ماينينگكە قارسى كۇشەيتىلگەن قورعانىستى بۇگىننەن باستاپ ياندەكس.براۋزەردە بارلىق پلاتفورما بويىنشا: iOS پەن Android بازاسىنداعى كومپيۋتەرلەردە دە، ءموبيلدى قۇرىلعىلاردا دا قولدانۋعا بولادى.

ياندەكس.براۋزەر 2012 جىلى ىسكە قوسىلدى. براۋزەرگە كىرىكتىرىلگەن پروتەكت تەحنولوگياسى قولدانۋشىلاردى ينتەرنەتتە تاپ كەلەتىن بارلىق قاۋىپتەن قورعايدى. ول سايتتار مەن فايلداردا ۆيرۋستىڭ بار-جوعىن تەكسەرەدى، الاياقتاردىڭ پاراقشاسىن بۇعاتتايدى، پارولدەر مەن بانك كارتاسى مالىمەتتەرىن قورعايدى.