وبلىس اكىمى دانيال احمەتوۆ وسكەمەن قالاسىنىڭ سۋ باسقان اۋداندارىندا بولىپ، تابيعي اپاتتان زارداپ شەككەن تۇرعىندارمەن كەزدەستى. اتاپ ايتقاندا، ايماق باسشىسى شاھاردىڭ ىرگەسىندەگى كراسين كەنتى مەن ابلاكەتكا ىقشاماۋداندارىندا قارعىن سۋ باسقان جەكە ۇيلەردىڭ تۇرعىندارىمەن جولىعىپ، حال-جاعدايىن ءبىلىپ قايتتى. بۇل تۋرالۋ جەرگىلىكتى Altaynews حابارلادى.

قاجەتتى جۇمىستار جۇرگىزىلىپ جاتقانىنا قاراماستان، بۇگىن تاڭەرتەڭ وقيعا ورنىنا بارعان وبلىس اكىمى دانيال احمەتوۆ توتەنشە جاعدايلار دەپارتامەنتى مەن قالا اكىمدىگىنىڭ جۇمىسىن قاتاڭ سىنعا الدى.

— سىزدەر ءبىر ارىقتىڭ سۋمەن ءبىر تاۋلىك بويى الىستىڭىزدار. اينالدىرعان ءتورت ءۇيدىڭ پروبلەماسىن وسىنشاما ۇزاق ۋاقىت شەشە الماۋلارىڭىز اقىلعا سيمايدى. بۇل — بارىپ تۇرعان ماسقارا عوي. بىلتىر سىزدەرگە قوماقتى قاراجات ءبولىپ، مۇنداي جاعدايدا قاجەتتى بولاتىن تەحنيكا الۋعا كومەكتەسكەنبىز. سول تەحنيكا قايدا، نەگە پايدالانبايسىزدار؟ جالپى، مۇنداي احۋالدىڭ قالىپتاسۋىنا تابيعات ەمەس، ءوز مىندەتتەرىنە سالعىرت قاراعان كەي لاۋازىمدى تۇلعالار كىنالى، — دەدى اكىم.

ەستەرىڭىزگە سالايىق، وبلىس ورتالىعىندا ەكى كۇن بويى تولاسسىز جاۋعان قار ارالاس جاڭبىردىڭ سالدارىنان قالانىڭ ءبىرقاتار اۋدانى مەن كوشەلەرىن سۋ باسىپ، توتەنشە جاعداي قالىپتاسقان بولاتىن. اپاتتان كراسين كەنتىندەگى كوجەدۋب جانە پۋشكين كوشەلەرى بويىندا ورنالاسقان ءتورت ءۇيدىڭ تۇرعىندارى زارداپ شەكتى. جەرگىلىكتى تۇرعىنداردىڭ ءبىرى اندرەي تاتارچەنكونىڭ مالىمدەۋىنشە، مۇنداي جاعدايدىڭ ورىن الۋىنا وسى ماڭداعى ارىق ارناسىنىڭ ءجوندى ءارى ۋاقتىلى تازالانباۋى سەبەپشى بولعان. ناتيجەسىندە ارىق سۋى ارناسىنان اسىپ، ىرگەدەگى اۋلالار 40 سانتيمەترلىك سۋ استىندا قالعان. اپاتتى جويۋ ماقساتىندا وقيعا ورنىنا توتەنشە جاعداي دەپارتامەنتىنىڭ ماماندارى مەن تەحنيكاسى جۇمىلدىرىلىپ، جەكسەنبى كۇنى ءتۇننىڭ ءبىر ۋاقىتىنا دەيىن جۇرگىزىلگەن جۇمىستاردىڭ ارقاسىندا اۋلالار سۋدان تازارتىلدى.

ءدال وسىنداي جاعداي ابلاكەتكا ىقشاماۋدانىندا دا قالىپتاسقان. ءبىراق بۇل جەردەگى ەكى اۋلانى باسقان تەرەڭدىگى 80 سانتيمەترلىك سۋدى جويۋ ءىس-شارالارى ءالى دە جالعاسۋدا.