ۇكىمەتتىڭ بۇگىنگى وتىرىسىندا ۇلتتىق بانكتىڭ ءتوراعاسى دانيار اقىشيەۆ "7-20-25" باعدارلاماسىنىڭ جوباسىن تانىستىردى، دەپ حابارلايدى قازاقپارات-قا سىلتەمە بەرىپ Qamshy.kz اقپارات اگەنتتىگى.

باس بانكيردىڭ ايتۋىنشا، 7 پروسەنتتىك يپوتەكامەن اينالىساتىن ارنايى كومپانيانىڭ كاپيتالى ۇلتتىق بانكتىڭ ەسەبىنەن قالىپتاسادى. كومپانيا ول اقشاعا ەكىنشى دەڭگەيلى بانكتەر بەرگەن جاڭا يپوتەكالىق نەسيەلەردى ساتىپ الادى.

 "جاڭا باعدارلاما اركىمگە جەڭىلدىك شارتتارىن بەرەدى. الايدا باعدارلاما ماسىلدىققا جول بەرمەۋگە ءتيىس. باعدارلاما قارىز الۋشىنىڭ تولەمگە قابىلەتتى بولۋىن تالاپ ەتەدى. وعان رەسمي كىرىسى بار قازاقستان ازاماتتارى قاتىسا الادى. ءقازىر بانكتەرمەن جاڭا باعدارلامانىڭ شارتتارى پىسىقتالۋدا. مىسالى، ءۇيدىڭ باعاسى 7 ميلليون تەڭگە بولسا، اي سايىنعى تولەم 50 مىڭ تەڭگەدەن اسپايدى. بۇل جالپى العاندا جۇمىس ىستەيتىن قازاقستان ازاماتتارىنىڭ كوپشىلىگى ءۇشىن قولايلى"، - دەدى د.اقىشيەۆ.

ونىڭ سوزىنە قاراعاندا، بۇگىندە رەسپۋبليكا بويىنشا تۇرعىن ءۇيدىڭ باعاسى ءار الۋان. سوندىقتان ءىرى قالالار مەن ايماقتار بويىنشا باسپانا باعاسىنا ديففەرەنسياسيا جاسالۋى مۇمكىن.

 "باعدارلامانىڭ قازىرگى ولشەمدەرى ازىرشە جوبا ەكەنىن ەسكەرۋ كەرەك. بۇنىڭ بارلىعى ءالى مەملەكەتتىك ورگاندار مەن بانكتەرمەن تالقىلانادى. سونداي-اق، جەرگىلىكتى اتقارۋشى ورگاندارىنىڭ پىكىرىن ەستۋىمىز كەرەك"، - دەپ اتاپ كورسەتتى د.اقىشيەۆ.